Эрүүл мэндийн сайд Удвал өнөөдөр гадаадад эмчлүүлэх эмчилгээний зардал хүссэн 17 иргэнтэй уулзаж эмчилгээний зардалд нь дэмжлэг үзүүлэхээр болсноо дуулгалаа.

Анх 2011 оноос гадаад оронд эмчлүүлэх иргэнд санхүүжилт олгох журмыг баталсан бөгөөд  журамд манайд эмчлэх боломжгүй 27 нэр төрлийн өвчний жагсаалтыг гаргасан байдаг. Ингэснээр жагсаалтад орсон өвчнөөр шаналж буй, гадаадад зайлшгүй эмчлүүлэх шаардлагатай иргэдийн эмчилгээний зардалд дэмжлэг үзүүлэх болсон юм. Тусламж хүссэн иргэдэд 1-5 сая төгрөгний дэмжлэг үзүүлдэг юм байна. Энэ оны эхний хагас жилийн байдлаар 84 иргэнд 256 сая төгрөгийг олгожээ.

ЭМЯ-нд жилд дундажаар 250-300 гадаадад эмчлүүлэх эмчилгээний зардалд дэмжлэг хүссэн иргэдийн өргөдөл ирдэг бөгөөд гуравны нэг нь гадаадад илгээн эмчлүүлэх өвчний жагсаалтад орсон өвчтэй иргэд байдаг аж. Эдгээрийг төрлөөр нь авч үзвэл мэдрэл, хорт хавдар тархины болон зүрх судасны мэс засал, нүдний өвчин, эрхтэн шилжүүлэн суулгах гэх мэт өвчнүүд дийлэнх хувийг нь эзэлдэг гэлээ. Мөн гадаадад эмчлүүлэх санхүүгийн дэмжлэг авч байгаа иргэдийн 42 хувь нь гурван сартайгаас 17 хүртэлх насны хүүхдүүд байгаа нь ихээхэн анхаарал татсан асуудал гэдгийг албаныхан хэлж байлаа. 

Гадаадад эмчлүүлэх эмчилгээний зардалд дэмжлэгэ хүссэн иргэд дараах материалыг бүрдүүлэх шаардлагатай аж. Үүнд:
1.    Өвчнийг манайд эмчлэх боломжгүй гэсэн төв эмнэлэг эсвэл мэргэшсэн төвүүдийн дүгнэлт
2.    Өвчтөнийг хүлээн авч эмчлэх гадаадын эмнэлгийн урилга, зөвшөөрлийн бичиг
3.    Тухайн иргэний дэмжлэг хүссэн өргөдөл
4.    Оршин суугаа хорооны засаг даргын тодорхойлолт
5.    Өрхийн эмнэлгийн тодорхойлолт
6.    Эрүүл мэндийн даатгалын дэвтрийн хуулбар /нотиаратаар баталгаажсан/
7.    Иргэний үнэмлэхний хуулбар /нотиаратаар баталгаажсан/
8.    Хүүхэд бол гэрчилгээний хуулбар /нотиаратаар баталгаажсан/
9.    Гадаадад эмчилгээ хийлгээд ирсэн тохиолдол тухайн эмнэлэгт төлбөр төлсөн баримт /эх хувь/