Мөрдөн байцаагчид Б.Тулгын цүнхнээс Н.Энхбаярын нууц ажиллагааны төлөвлөгөө гэгчийг олсон нь олон нийтэд хүрсэн билээ. Түүний стратегийн өмгөөллийн ажлын төлөвлөгөө гэх хүснэгтэд О.Магнай, А.Баатархуяг, Г.Уянга нарын нэр дурайж буй нь олны анхаарал татсан. Тэр төлөвлөгөө гэгч Н.Энхбаярынх мөн биш гэхээсээ илүү иргэний хөдөлгөөний дуу хоолой болсон залуус хэн нэгний гар хөл болж явдаг юм биш биз гэх хардлага нийгэмд төрүүлсэн билээ. Тиймээс "Иргэний хөдөлгөөн"-ий удирдагч О.Магнайтай ярилцлаа.

-За, та чинь яаж яваад Н.Энхбаяртай найз болчихов оо?
-Хэдэн вэб сайт, зарим өдөр тутмын сонинд гарсан мэдээллийн талаар асууж байх шиг байна. Хүмүүс тэр мэдээллийг facebook дээр тавьсныг анх харсан. Яахав дээ, нийгэмд зөв зүйл ярьдаг, төрд байгаа олигархи бүлэглэлийн эсрэг тэмцдэг бүх хүнийг нэг хайрцагт оруулах гэсэн улс төрийн зорилготой үйлдэл гэж харж байна.

-Хэний хийсэн зорилготой үйлдэл гэж?
-Өнөөдөр эрх барьж буй бүлэглэлийн л эрх ашиг зөрчигдөж байгаа биз дээ. Яагаад гэвэл бид тэдний эсрэг тэмцдэг. Нийгэмд тэмцэж байгаа бүхнийг Н.Энхбаяртай нэг хайрцагт хийх сонирхол эрх баригчдад л байгаа Тэгтэл нийгэм өөрөө олон өнгө, өнцөгтэй. Заавал Н.Энхбаяр, эсвэл МАНАН-гийн тал байна гэж байхгүй. МАНАН-тай тэмцлээ гэхэд Н.Энхбаяртай нийлэх ёстой гэж ойлгох нь өөрөө өрөөсгөл болно.

-Тэр төлөвлөгөө гэгч зохиомол, худал гэж үү?
-Ор үндэсгүй зүйл гэдгийг хариуцлагатай мэдэгдье.

-Б.Тулгыг суллуулахаар тэмцэж байгаа "Шударга ёс" хуульчдын эвлэлийн гишүүн Э.Эрдэнэжамъян "О.Магнай, Б.Тулга бид нар сууж байгаад стратегийн төлөвлөгөөг гаргасан" гэж манай сонинд ярьсан. Харин та гэр төлөвлөгөөг мэдэхгүй гээд байдаг.
-Тэр залуу ямар зорилгоор ийм мэдээлэл тараасныг мэдэхгүй байна. Г.Уянга, А.Баатархуяг нараас энэ талаар тодруүлахыг зөвлөх байна.

-Тэгвэл хэн ийм төлөвлөгөө зохиож олон нийтэд тараачихсан юм бол. МАН-ын зарим нөхдүүдийн хийсэн ажил гэж хардах ч хүмүүс байгаа.
-Хэн ийм зүйл хийснийг мэдэхгүй байна. Магнай гэдэг нэр тэр хүснэгтэд хэдэнтээ орчихсон байсан учраас л анхаарч үзсэн. Иргэний хөдөлгөөнүүд олигархижиж буй тогтолцоотой тэмцэх эцсийн хүч гэдэгтэй өнөөдөр бүгд санал нийлж байгаа байх. Тэгэхдээ энэ тэмцэл нь хэн нэгэн хүний болон бүлэглэлийн төлөө биш гэдгийг онцолмоор байна.

-А.Баатархуяг, Г.Уянга та гурвыг үй зайгүй найзууд гэдэг. Тиймдээ ч Н.Энхбаярын нууц ажиллагаа гэгчид хамтарч ажиллах шийдвэр гаргасан юм биш үү?
-Би хувь хүнд үйлчилдэг хүн биш. Тийм шаардлага ч байхгүй. Ямар зорилгоор ийм худал мэдээлэл цацсаныг цаг хугацаа харуулах байлгүй дээ.

-Сэтгүүлчдийн эрхийг хамгаалах байгууллагад хандах, сэтгүүлч ял сонссон тухай мэдээлэл тараах, Л.Гансүх, Ц.Нямдорж зэрэг сайдуудын гэрийн гадна тэмцэл хийх зэргийг А.Баатархуяг, Г.Уянга та гурав зохион байгуулах мэтээр бичсэн байна лээ. А.Баатархуяг, Г.Уянга нар сэтгүүлчийнхээ хувиар ял сонссон үед дээрх мэдээлэл итгэхээс аргагүй юм биш үү. Магадгүй өорсдийгөө хамгаалуулахын тулд Н.Энхбаярыг ашигласан байж болох талтай.
-Г.Уянгатай өчигдөр утсаар ярихад Говь-Алтай аймагт явж байна гэж байсан. Сонинд гарсан зүйлийн талаар талаар ямар нэгэн мэдээлэлгүй байна лээ.

-Төлөвлөгөөнд дурдсанаар та гурвын хариуцах ажил яг л та бүхний хэлдэг, ярьдаг зүйл байна лээ.
-Тэр мэдээллийг сонинуудад төлбөртэй тавьсан байна лээ. Тэгэхээр захиалагч нар нь илүү сайн мэдэх байлгүй дээ.

-Төлөвлөгөөнд хийж байгаа ажлаа тухай бүрт нь олон нийтэд хүргэх ёстой гэсэн байсан шүү дээ.
-Энэ асуудлын хүрээнд би өөрийн байр суурийг танд бүрэн хэллээ гэж бодож байна.

-Та гурвын нэрийг оруулах ямар сонирхол байсан гэж?
-Тэрийг би мэдэхгүй. Хийсэн хүмүүст нь зорилго байсан биз. Миний хувьд болон бидний бий болгосон бүтэц нийгэмд хийх ёстой ажлаа хийгээд явж байгаа. Гэхдээ МАХН-тай хамтарч ажиллах зэргээр тохирсон зүйл байхгүй.

-Манай бүтэц гэдгээ тодруулаач. Г.Уянга, А.Баатархуяг... гээд нэр цохох уу?
-Бид хувьсгалт үзэл санаан дээр нэгдсэн нөхөд. Бүтцийн хувьд тусдаа.

-Төлөвлөгөөгөө хэрэгжүүлэхдээ хамгаалах биш давших тактик баримтална гэсэн байна лээ. Таны тэмцэгч чанар энэ шаардлагыг хангаад байгаа юм биш үү?
-Би тэмцэгч хүн. Гэхдээ хүн, эсвэл бүлгийн төлөө тэмцдэггүй гэдгийг дахиад хэлье.

-Та Н.Энхбаярын стратегийн өмгөөллийн ажиллагааны төлөвлөгөө гээчийг агуулгаар нь юу гэж харж байна вэ?
-Нэг айхавтар буруу зүйл харагдаагүй. Гэхдээ иргэний нийгмийн бүтцийн байгууллагууд МАХН-тай ямар харилцаатай байх вэ гэдэгт шийдвэр гаргаагүй байна. Тиймээс ч биднийг МАХН-тай нэг саванд оруулах, нэг өнгөтэй мэт харагдуулах нь утгагүй, тэгээд ч зохимжгүй.

-Та хэзээ мөдгүй хувьсгал хийнэ гэж ярьдаг. Н.Энхбаяр ч нийгэмд өөрчлөлт хийх цаг болсныг хэлж байгаа. Ер яагаад нь нэгдээд хувьсгал хийж болохгүй гэж.
-Тэр хүний сонинд өгсөн ярилцлагыг уншиж байхад хувьсгалын шинжтэй өөрчлөлтийг дэмжиж байгаа нь ажиглагдсан. Үүнийг сайшааж байгаа. Энэ нь Н.Энхбаяртай нэгдэнэ гэсэн үг биш. Энэ нийгэмд олон өнцөг байгааг хэлээд байгаа шүү дээ.

-С.Молор-Эрдэнэ жилийн өмнө Н.Энхбаярыг тантай танилцуулсан гэх юм. Та өөрөө Н.Энхбаяртай танилцахыг хүссэн үү?
-Хувьсгалт бүлгийн зөвлөлийн уулзалт хийж байхад С.Молор-Эрдэнэ Н.Энхбаяртай хамт ирсэн. С.Молор-Эрдэнэтэй хувьсгалт үзэл санааны асуудлаар санал солилцож байхдаа Н.Энх-баяр гуайтай танилцаж байлаа. Сүүлд санал солилцож хэд хэд уулзсан.

-Н.Энхбаяр өөртэй чинь хамтраад тэмцье гэвэл яах вэ?
-Мэдэхгүй. Үүнд би ганцаараа шийдвэр гаргадаггүй. Иргэний хөдөлгөөнүүдийн нэгдсэн холбоо Удирдах зөвлөлтэй. Өнөөдрийг хүртэл МАХН-тай яаж ажиллах талаар шийдээгүй.

-Магадгүй та нарын хувьсгалыг Н.Энхбаяр санхүүжүүлж болохгүй гэж үү. Харин ч та нарын ар тал найдвартай болох юм биш үү?
-Нийгмийн сайн сайхны төлөөх тэмцэлд санхүүжилт хамгийн чухал зүйл биш шүү дээ. Хамгийн чухал нь үзэл санаан дээрээс итгэл үнэмшлээрээ нэгдсэн иргэд байдаг юм.

-Та "Долдугаар сарын 1"-тэй холбогдуулан С.Баярыг шүүмжилж байсан. Үймээнд Н.Энхбаярыг буруутгахгүй байсны учир одоо тайлагдаж байна гэж харах ч нэгэн байна.
-Н.Энхбаяр Ерөнхийлөгчийг бид хангалттай шүүмжилж байсан. Яахав, тэр хүнийг хаан байхад үүдэнд нь байсан хэдэн нөхдүүд боорлож байхад бид нэрмээс болж янз бүрийн юм ярих утгагүй биз дээ. Ядарсан хүнийг дээрэлхээд, задарсан нэгэнд нь долигоноод байх зан надад байдаггүй. Энэ миний зарчим.

-Н.Энхбаяр одоо иргэн. Нэг иргэний эсрэг Хууль зүй, дотоод хэргийн яам бүрэлдэхүүнээрээ ажиллаж байна гэх. Ийм үед иргэний нийгмийн байгууллагууд яагаад Н.Энхбаяр гэдэг иргэнийг хамгаалж болохгүй гэж?
-Үнэхээр хэрэг хийсэн бол хариуцлага хүлээх ёстой. Гэхдээ улс төрийн зорилгоор хэлмэгдүүлэх гэвэл асуудал өөр түвшинд яригдах биз дээ.

-Ерөнхийлөгч асны шадар туслахыг баривчилс- ныг эсэргүүцсэн иргэд УМБГ-ын үүдэнд жагсаал зохион байгуулж, тэмцлээ илэрхийлж байна. Үүнийг та зөвтгөх үү?
-Тэр хүнийг ямар учраас баривчилсныг мэдэхгүй. Н.Энхбаяр сонинд өгсөн ярилцлагадаа "Шалгуулъя. Гэхдээ зарим хүнтэй хамт шалгуулъя" гэж ярьсан байсан. Тэгэхээр хуулийн байгууллага хамтад нь шалгах ёстой байх.

-Н.Энхбаярын хэлснээр Ц.Нямдоржийг шалгах ёстой гэж үү?
-Шалгах л ёстой, олон тэрбумаар үнэлэгдэх хөрөнгийн асуудал сонин дээр гарсаныг олон хүн харсан байх.

-МАХН-ын гишүүдийг Улсын онцгой объект болох УМБГ-ын үүдэнд жагсаал цуглаан зохион байгууллаа гэж буруутгаж буй.
-Ер нъ хаана ч жагсаж, цуглаж, тэмцэж болно. УМБГ гэж яачихсан" газар юм. Өнгөрсөн хугацаанд хэдэн ядарсан ардын хүүхдүүдийг л шоронд хийснээс задарсан хэнтэй хариуцлага тооцсоныг би санахгүй байна.

-Н.Энхбаярын хүү Э.Батшугарыг баривчилж магадгүй гэсэн мэдээлэл байна. Н.Энхбаяр ч өөрөө "Миний эхнэр хүүхдээр оролдоод эхэллээ" гэж ярьж байсан. Үнэхээр Н.Энхбаярын ойр дотнын бүх хүнийг яллаад байна уу?
-Хуучин Ерөнхийлөгчийн хэвлэлийн төлөөлөгчөөс нь асуувал зүгээр байлгүй дээ. Би юу хэлэхэв.