Төрөх эмнэлгүүдийн ачааллыг гэнэт нэмэгдүүлсэн алтан гахай жилийн хүүхдүүд энэ жил зургаан нас хүрч, сургуульд ороход бэлэн болжээ. Алтан гахай жилд хамгийн олон хүүхэд төрсөн талаар статистикийн хорооноос мэдээлсэн. Төрөх эмнэлгийн ачаалал ихсэв гэсэн яриа гарсны дараа цаашдаа цэцэрлэгүүдийн ачаалал ч нэмэгдэнэ гэдгийг статистикчид ч анхааруулж байсан. Нэг хэсэгтээ төрөх эмнэлгийн, дараа нь цэцэрлэгүүдийн ачааллыг шалгаж байсан алтан гахайн үрс дахин нэг даваагаа давах гэж байна.

Харамсалтай нь, монголчууд алтан гахайн хүүхдүүдээ бүү хэл, хэдэн үеийн хүүхдүүдээ сургууль цэцэрлэгээр  хангаж чадахгүй байгаа нь үнэн. Үүн дээр энэ жил алтан гахайн гэх бас нэгэн “нэмэгдэл” эцэг эхчүүдийг ч сургуулийнхныг ч сандаргах нь. Дашрамд “эргэлзэхэд” ачаалал нэмэгдэнэ гэдгийг аль хэдийнэ статистик тооноос мэдсэн байх учиртай холбогдох албаныхан сургууль, цэцэрлэгээ бэлтгээгүйг бодоход нэг их сандраагүй бололтой юм. 

Зөвхөн энэ жил 22584 зургаан настай, гахай жилтнүүд сургуульд орно гэж байгаа нь өмнөх жилүүдийнхээс давсан тоо аж. Алтан гахайн үрс, үрс ч юу байхав дээ, эцэг эхчүүд нь хүүхдүүдэд нь сургууль олдох болов уу гэсэн айдастай байна. Тэдэнд сургууль олдох болов уу?. Эцэг эхчүүд санаагаа чилээсээр.

Хамгийг номхотгогч хэмээх гахай жил буюу 2007 онд хүүхэд төрүүлбээс нас буян урт, баян чинээлэг амьдрах нигууртай хэмээх сүсэглэл амнаас ам дамжин алтан гахай жилд амжиж хүүхэд төрүүлэгсдийн давалгаа үерлэсэн. Эдүгээ тэднийг “алтан гахай жилийн хүүхдүүд” гэж өхөөрдөн нэрлэдэг нэршил аль хэдийнэ бий болоод байгаа.