НОБГ-ын Урьдчилан сэргийлэх хэлтсийн мэргэжилтэн, дэслэгч Г.Сэдэдсүрэнгээс үер усны осол болоод тарваган тахлын хяналт шалгалтын талаар зарим зүйлийг тодрууллаа.

-Өчигдрийн байдлаар ямар дуудлагууд ирэв. Хэр ачаалалтай ажлав?
-Нийслэлийн онцгой байдлын газарт өчигдөр Баянзүрх дүүргийн 18 дугаар хороо Маршилын гүүрний доор согтуу хүн живж байна гэсэн иргэдийн дуудлагаар нийслэлийн аврах салбарын бүрэлдэхүүн очсон. Ингэхэд 35 настай Отгонбаяр гэгч согтууруулах ундаа хэрэглэсэн үедээ голд орж, хөл алдаж живж байсныг Нийслэлийн онцгой байдлын аврах бүрэлдэхүүн шуурхай ажиллаж амь насыг нь аварсан байгаа. Мөн Налайх дүүргийн хоёрдугаар хороо, Тайжийн 2-т Бужийн гэх айл үерт автсан байсан. Дуудлагаар Налайх дүүргийн онцгой байдлын хэлтсийн гамшгийн улсын хяналтын ахлах байцаагч хошууч н.Ганбатаар ахлуулсан долоон хүний бүрэлдэхүүн очиж дөрөв болон таван ханатай хоёр гэрийг, гэр бүлийн дөрвөн хүний хамт аюулгүй болгосон. Энэ айл нь үерийн далангийн сувагтай газар буусан байсан.

-Үерийн далантай ойрхон буусан айлуудад зөвлөмж хүргэж байгаа юу?
-Цаг уурын станцаас ирүүлсэн мэдээгээр энэ долоо хоногийн сүүл хүртэл түр зуурын болон үргэлжилсэн бороотой байгаа. Өчигдрийн байдлаар Туул голын ай сав адагруугаа 10-20 см төвшингөөр нэмэгдсэн. Үүний улмаас үер усны аюулаас хамгаалах бүхий л зөвлөмж, зөвлөгөөг Нийслэлийн онцгой байдлын газраас өгч ажиллаж байгаа. Туул голын эрэг дагуу үерт өртөж болзошгүй газар зусланд буугаад байгаа айлуудыг нэн даруй нүүхийг анхааруулж байна. Мөн согтууруулах ундаа хэрэглэсэн үедээ голд орохгүй байх, бага насны хүүхдийг хараа хяналтгүйгээр голын ай сав газар тоглуулахгүй байх зэрэг сэрэмжлүүлгийг Нийслэлийн онцгой байдлын газраас өгч байгаа. Мөн завьт эргүүл өдрийн турш явуулж байгаа. Энэхүү эргүүл маань сэрэмжлүүлэг явуулахаас гадна аврах ажлыг цаг тухайд нь гүйцэтгэж байна.

-Аянга цахилгаан цохиулж нас барлаа гэх мэдээлэл их гарах боллоо. Ер нь дуу цахилгаантай бороотой үед аянга цахилгаанаас өөрийгөө хэрхэн хамгаалах хэрэгтэй вэ?
- Дуу цахилгаантай бороо орсон үед иргэд утсаа нэн түрүүнд унтрааж байх хэрэгтэй. Мөн цахилгаан хэрэгслүүдээ салгах нь чухал.  Хээр гадаа явж байгаа улс биедээ байгаа төмөр эдлэлүүдээ холдуулах шаардлагатай. Өндөр мод, дов, дош, замаас зайлж хонхор газар явах хэрэгтэй. Өндөрлөг газраас нам дор газар явсан нь дээр. Морь унаж яваа хүн морьноосоо буух, тарваганы дош, өндөр ургасан өвстөй газраас аль болох зайлхийх хэрэгтэй.

-Тарваган тахлаас сэргийлж постууд ажиллаж байгаа гэсэн. Зөрчил гарч байна уу?
-Нийслэлийн засаг даргын захирамжийн дагуу гоц халдварт өвчин болох тарваган тахлыг нэвтрүүлэхгүй байхын тулд ЭМЯ, ЗЦГ, МХЕГ, НОБГ, ЦЕГ гэх мэт нь үүргийнхээ дагуу ажиллаж байгаа.  Нийслэл хотын хэмжээнд хөдөө орон нутгаас орж ирж байгаа зам дээр постууд ажиллаж байна. Мөн модны хулгайн замуудаар тарвага орж ирэх магадлалтай учир нэмэлт хөдөлгөөнт постууд ажиллаж байгаа. Тэгвэл Нийслэлийн онцгой байдал энэ бүгд дээр хяналт тавих үүргийг авсан. Тиймээс энэ сарын 1-нд бүх постуудаар хяналт шалгалт хэр явагдаж байгаа талаар газар дээр нь үзлэг шалгалт хийгээд холбогдох хүмүүстээ мэргэжлийн заавар зөвлөгөө өгөөд ирсэн. Тэгвэл маргааш дахин бүх постуудаараа шалгалт явуулна. Түүнчлэн Багахангай, Багануур дүүрэг дээр ч ажиллана. Гарсан хэрэг зөрчлийн хувьд Налайх дүүргийн хяналтын пост дээр Улаанбаатар хотруу хоёр ширхэг тарваганы боодог оруулах гэж байсныг саатуулж мэргэжлийн хяналтад хүлээлгэж өгсөн байгаа.

-Өнгөрсөн амралтын өдөр 50 сая төгрөг нэхэмжилж амиа хорлохыг завдлаа. Танай аврагчид энэ хүнийг аврахын тулд олон цаг ажилласан гэсэн?
-Манайд энэ сарын 3-ны 00.57 цагт Цэрэнноров гэгч хүн өргөгч кран дээрээс үсэрч амиа хорлох гээд байна гэсэн дуудлага ирсэн. Дуудлагын дагуу 21 хүний бүрэлдэхүүнтэй аврагчид 13 цаг ажиллаж, маргааш өдрийнх нь 13.20 цагт эсэн мэнд буулгаж чадсан.

-Амиа хорлох гэж байна гэсэн дуудлага ер нь их ирэх үү?
-Өнгөрсөн бямба гарагт Баянзүрх дүүргийн 17-р хороо Шар хадны Ээж хайрханы задгайд өндөр хүчдэлийн шон дээр иргэн Б согтуугаар гарч амиа хорлохыг завдсан. Аврагчид цахилгааны хүчлэлийг салгуулан, буулгаж амь насыг нь аварсан.  Энэ хүн эхнэртэйгээ муудалцаж амиа хорлохыг завдсан байгаа. Хамгийн гол нь иргэд хоорондоо ойлголцож болох зүйл дээр амиа хорлох дээрээ тулж байгаа нь буруу юм.  Тэдний энэ үйлдлийг зогсоохоор манай аврагчид олон цаг ажилладаг. Энэ хооронд өөр олон хүнд янз бүрийн асуудал тулгарч байдаг шүү дээ.