Нийслэлийн шинэчлэлийн баг иргэддээ таатай, эрүүл аюулгүй орчин бүрдүүлэхийг гол цөмөө болгон ажиллаж байна.Тиймээс эрүүл байхын хамгийн чухал үндэс болсон агаар нь цэвэр хот болохын төлөө томоохон ажлуудыг хийж эхлээд байгаа юм.  Нийслэлийн Засаг даргын 2013-2016 онд хэрэгжүүлэх үйл ажиллагааны хөтөлбөрт “Нийтийн эзэмшлийн зам талбай, ногоон байгууламжийн арчлалт, хамгаалалтын тогтолцоог нийслэлийн иргэд, аж ахуйн нэгж, байгууллагын идэвхи санаачлагад тулгуурлан бий болгон хөгжүүлнэ”, “Төрийн бус байгууллага, иргэд, аж ахуйн нэгжтэй хамтран ажиллаж хотын ногоон бүсийг 20 хувь хүртэл нэмэгдүүлэх зорилт туссан юм.

Мөн НИТХ-ын тогтоолоор аж ахуйн нэгж байгууллагууд орчныхоо 50 м газрыг тохижуулах үүрэгтэй бөгөөд 10 хувьд нь ногоон байгууламж байгуулах тухай Нийслэлийн Засаг даргын захирамж гарсан билээ. Тиймээс ч бид  2013 оныг “Хотын гудамж, талбайн ногоон байгууламжийн арчилгааны ажлын менежментийг өөрчлөн шинэчилж, арчлалтыг сайжруулах жил” болгон зарлаж багагүй ажил хийлээ.

Улаанбаатар хотоо цэвэр агаартай цэмцгэр хот болгох бидний ажлыг дэмжин “Улс төрийн тойм сонин”, www.ipost.mn сайтаас “Шарилжгүй Улаанбаатар” аяныг санаачлан эхлүүлжээ. Олон нийтийг эгнээндээ нэгтгэж чадсан энэхүү аяныг бид талархан дэмжиж байгаагаа энэ дашрамд хэлэхэд таатай байна. “Шарилжгүй Улаанбаатар” аяныг Улаанбаатар хотын бүхий л иргэд, аж ахуйн нэгж байгууллагууд дэмжиж ажил хэрэгчээр хандана гэдэгт итгэлтэй байна.