Өнөөдөр ҮХААЯ-ны Төрийн нарийн бичгийн дарга Х.Золжаргал сурагчын дүрэмт хувцсыг оёж байгаа зарим үйлдвэрүүдийн үйл ажиллагаатай танилцлаа.  Дүрэмт хувцас оёх ажилд 130 гаруй компани оролцож байгаа бөгөөд үүнээс оёдлын 69, сүлжмэлийн 48, хялгас ялгах найм, ээрэх зургаа компани байгаа юм. Эдгээрээс найман компанийн ажлын явцтай өнөөдөр танилцаж үйлдвэрийн эзэдтэй уулзлаа.

Хамгийн түрүүнд утас ээрэх зургаан компанийн нэг “Мон форте” компанийн ажилтай танилцсан юм. Энэ компани цамц болон майк хийх хонины ноосон утас ээрч нэхмэлийн компаниудад нийлүүлэхээр болжээ. “Мон форте” ХХК ирэх есдүгээр сарын 15-н гэхэд 5,7 тонн утас үйлдвэрлэж өгөх гэрээтэй ажиллаж байгаа бөгөөд одоогийн байдлаар 1,7 тонныг нь ээрч дуусан нэхмэлийн компаниудад нийлүүлсэн байна. Хонины ноос хатуу учир хоёр удаагийн самналт хийж ноолуур гарган авч байгаа бөгөөд бэлдсэн ноосоо “Эрдэнэт” рүү явуулж будуулаад үүнийхээ дараа утас ээрдэг аж. Мөн компани хугацаандаа амьжихын тулд хоёр ээлжийн 24 цагаар ажиллаж байгаа гэнэ.

Сурагчдын дүрэмт хувцасны майк болон ноосон цамцыг зургаан компаниар толгойлуулсан 36 жижиг дунд үйлдвэрт сүлжиж байгаа бөгөөд ирэх аравдугаар сарын 30-нийг хүртэл нийт 67703 ширхэг ноосон цамц, 120277 ширхэг майк нийлүүлэх юм байна.   Туслан гүйцэтгэгч компаниудын нэг “Нью Рояалди” ХХК гэхэд ирэх 10 сарын 30-ныг хүртэл ноосон цамц майк нийлээд 9700 гаруй бүтээгдэхүүн үйлдвэрлэх гэрээ байгуулан ажиллаж байгаа аж.

Үүнийг сурагчын дүрэмт хувцасны зөвхөн өмд оёх захиалга авсан “Есөн зэв” компанитай танилцсан юм. Тэд энэ сарын 1-нээс ажлаа эхлүүлсэн бөгөөд өдөрт 150-200 өмд оёж одоо нийтдээ 1000 орчим өмд оёод байгаа юм байна.

ҮХААЯ-ны Төрийн нарийн бичиг Х.Золжаргал: Дүрэмт хувцас үйлдвэрлэх ажил 100 хувь жигдрээгүй байна

- Эдгээр компаниудын ажлын явцыг та юу гэж дүгнэж байна вэ?

-Ер нь надад энэ ажлыг эхэлсэн гэж хэлсэн. Тиймээс яг эхэлж үү, үгүй юу гэдгийг нүдээрээ харах гэж ирсэн. Бас толгой гэж яригдаад байгаа том компаниуд нь жижиг аж ахуй нэгжүүдийнхээ ажлыг эхлүүлсэн байна уу, үгүй юу гэдгийг харах хэрэгтэй байсан. Тодорхой хэмжээгээр эхэлсэн байна гэдгийг харлаа. Гэхдээ 100 хувь жигдрээгүй байгааг харж байна.

- Дүрэмт хувцас оёх ажлыг хугацаанд нь дуусгах тал дээр яамны зүгээс яаж хяналт тавьж ажиллах вэ?

-БШУЯ-тай хийсэн гэрээгээр энэ сарын 25 гэхэд 1-3 дугаар ангийн сурагчдыг, 9 сарын 15-ны өдөр гэхэд дунд ангийн сурагчдыг, 9 сарын 30-ны дотор ахлах ангийн сурагчдын дүрэмт хувцсыг нийлүүлэхээр болсон. Бид гэрээнийхээ хугацаанд  биелүүлэхийг хичээж ажиллана. Мөн оёж байгаа үйлдвэрүүдээ шахаж, болохгүй байгаа зүйлийг нь газар дээр шийдээд, хариуцлага тооцоод явна. Тухайлбал “Өүлэн менч”-ийн захирал Ч.Буянбаатар өөрийн хариуцсан ажлыг төлөвлөгөөт хугацаанд нь өгнө гэж байна. Дараагийн удаа би бусад үйлдвэрээр нь орж ажлын явцтай танилцана.

- Ямар нэгэн бэрхшээл тулгарч байгаа талаар үйлдвэрүүдийн зүгээс таньд мэдэгдсэн үү?

-Сүлжмэлийн үйлдвэрүүд захиалгаа маш тодорхой болгохыг хүссэн байгаа. Бага ангийн хүүхдийн ноосон цамц л гэхэд тодорхой тоотой байх ёстой  гэж хэлсэн.  Гэхдээ бага анги гэхээр зургаан настай, долоон настай хүүхэд тус бүрдээ хичнээн байгааг хэлж нарийн ангилж өгөөгүй байна. Үүнийг “Оёдлын нэгдсэн холбоо” ангилж өгөх шаардлагатай. Мөн зарим газраа ажиллах хүч нь бүрэн бүрэлдээгүй байна. Бас хөдөө орон нутгийн жижиг цехүүдийг бүрэн хамруулж оролцуулах шаардлагатай байгаа. Энэ асуудлууд өдөр өдрөөр цэгцрэх байх гэж найдаж байна.