Ази, Номхон далайн Жижиглэн худалдаа эрхлэгчдийн холбооноос ирэх сарын 23-26-ны хооронд Бүгд найрамдах Турк улсын Станбул хотод жижиглэнгийн худалдаа эрхлэгчдэд зориулсан үзэсгэлэн, форумыг зохион байгуулах гэж байна. Энэхүү үзэсгэлэн, форум нь 1983 оноос хойш хоёр жилд нэг удаа тогтмол зохион байгуулсаар ирсэн бөгөөд Япон, Турк, Солонгос, Австрали, Шинэ Зеланд, Хятад, Тайвань, Хонгконг, Малайз зэрэг 30 гаруй орны бөөний болон жижиглэнгийн салбарт үйл ажиллагаа явуулдаг 3000 орчим байгууллага, аж ахуйн нэгж оролцдог аж. Тус үзэсгэлэн, форумаар эл салбарт хэрэглэж байгаа дэвшилтэт техник, технологи, бүтээгдэхүүн, үйлчилгээ, үйл ажиллагаагаа танилцуулж туршлага солилцон хамтын ажиллагаагаа өргөжүүлдэг гэнэ. Тиймээс энэхүү үзэсгэлэн, форумд оролцох сонирхолтой бизнес эрхлэгчдийг уржигдраас эхлэн ирэх сарын 1 -нийг хүртэл бүртгэх юм байна.