МХХААҮА /Монголын Хүнс Хөдөө Аж Ахуйн Үндэсний Ассоциаци/-иас газар тариалангийн гол бүс нутгийн ногоочдын дунд энэ сарын 1-3 хооронд “Төмс хүнсний ногооны үнэгүйдэл ба түүнээс гарах арга зам” сэдвээр хэлэлцжээ. Тэд энэ хэлэлцүүлгэд тавигдсан зарим асуудлаар шаардлага хүргүүлэхээр болж, энэ ажлыг гардан гүйцэтгэх түр хороо байгуулсан байна. Өнөөдөр тэд энэ асуудлаар хэвлэлийн бага хурал хийсэн бөгөөд тэд Ерөнхий сайд Н.Алтанхуяг, ҮХАА-н сайд Х.Баттулга, ШӨХТГ-ын дарга О.Магнай нарт 7 хоногийн хугацаатай 10 шаардлагыг хүргүүлжээ.

Шаардлагын заримаас нь дурьдвал:
- Манайд тариалсан хүнсний ногоо жимс жимсгэнийг нийслэлд дундын дамжлагагүйгээр үйлдвэрлэгчдээс-хэрэглэгчдэд шууд хүргэхийн тулд томоохон худалдааны төвүүдийн лангууны 30-40 хувийг үйлдвэрлэгчдэд түрээслэх боломж, нөхцлийг бүрдүүлэх

- Дотоодын хэрэгцээнээс илүү гарах төмс, хүнсний ногоо жимс жимсгэний тариалалт, хураалтад тооцоо хийж, экспортод гаргаж үндэсний үйлдвэрлэгчдийг бодлогоор дэмжих

- Малчдын загвар хоршоо байгуулсантай адилаар Газар тариалангийн загвар хоршоог идэвхтэй газар тариалан эрхэлдэг бүс нутгуудад байгуулан чадваржуулахад хөрөнгө мөнгөөр дэмжих

- Төмс ххүнсний ногооны нэг кг бүтээгдэхүүний өөрийн өртөгт суурилсан борлуулалтын үнийн доод түвшинг төр, үйлвэрлэгч гэсэн хоёр талын оролцоотойгоор тогтоож үүнийг хяналтын байгууллагуудаар хянуулах зэргийг шаарджээ.