Арван хэдхэн хоногийн дараа хүүхдүүд цэцэрлэг, сургуульдаа орох болно. Гэтэл цэцэрлэг, сургуулийн засварын явц хангалгүй байгаа юм. Учир нь одоо болтол хөрөнгө мөнгөний асуудал нь шийдэгдээгүй цэцэрлэг, сургууль хүртэл байгаа юм. Өчигдөр манай сурвалжлах баг хүн амын тоогоороо хамгийн ихэд орох Баянзүрх дүүргийн зарим нэгэн цэцэрлэгээр орж засварын ажилтай танилцаж, яг бодит байдал өнөөдөр хэр байгааг сурвалжиллаа.  Эхний ээлжинд гурван жил дамнан баригдаж байгаа 191 дүгээр цэцэрлэгээр ороход засварын ажил эд өрнөж байв. Гэвч ирэх сарын 1-н гэхэд энэ цэцэрлэг хүүхдүүдээ авах нь юу л бол. Учир нь одоо баригдаж дуусаагүй бас БШУ-ны яамнаас цэцэрлэгийн эд хогшлыг тендерээр шалгаруулж амжаагүй байгаа юм. Мөн баригдаж дууссаныхаа дараа Улсын комиссоор орно гээд л асуудал их байгааг уг цэцэрлэгийн эрхлэгч цухас дурдав.

Ингээд 191 дүгээр цэцэрлэгийн эрхлэгч Б.Пүрэвцэрэнгээс хэдэн зүйлийг тодрууллаа.

-Гурван жил дамнан баригдаж байгаа барилга гэлээ. Чухам ямар учраас ажил ийн удаашрах болов?
-Уг цэцэрлэгийн барилга оршин суугчдын эсэргүүцэлтэй тулгарч их удааширсан. Өөрөөр хэлбэл оршин суугчид газраа чөлөөлж өгөхгүй байсан. Хоёрдугаарт цэцэрлэгийн барилгын зураг төсөл буруу хийгдэж ангиуд нь хойшоо харсан байсан. Улмаар бүтэн эргүүлж урагшаа наран талруу харуулж зургийн өөрчлөлт оруулсан.  Тиймээс барилгын ажлыг эхнээс нь засаж янзалж хийх болсон. Мөн барилга маань шаардлага хангахгүй материалаар хийгдсэн учир дахин сольж цементэн хамтангаар хийсэн.  Энэ мэт ажлуудаас болж маш их удааширсан. Ингэж хугацаа алдах хооронд барилгын материалын үнэ их өссөн. Ингээд санхүү дээр гацсан.

-Цэцэрлэгийн барилгыг барихад хэдэн төгрөг төсөвлөсөн бэ?
- Гүйцэтгэгч компани нь яамныхантай зөвшилцөж БШУ-ны яамнаас нэмэлт хөрөнгө шийдэж өгөхийг хүссэн. Өнгөрсөн оны 12 дугаар сард  нэмэлт хөрөнгө шийдэж өгнө гэж хуралдсаны үндсэн дээр энэ барилга цаашид үргэлжлэхээр болсон.  Ингээд энэ оны хоёрдугаар сараас барилгыг үргэлжлүүлэн барьж эхэлсэн. Нийт 280 сая төгрөг төсөвлөгдсөнөөс гүйцэтгэгч компани 90 хувийг нь авсан байгаа. Мөн нэмэлтээр гадна шугам сүлжээний ажлыг хийхээр төсөвлөсөн 70 сая төгрөгний 50 саяыг авсан. Ингээд маш их мөнгө авчихсан байсан учир урьд нь гүйцэтгэж байсан компаниар үргэлжлүүлэн засуулах болсон.

-Ямар компани барилгын засварыг гүйцэтгэж байгаа вэ?
-“Баз” констаркшн. Гэрээнд зааснаар цэцэрлэгийн засвар энэ сарын 17-нд буюу нөгөөдөр дуусна.  Өнөөдрийн хувьд үлдэгдэл барилгын материалын тооцоог гаргаж Баз компанид хүргүүлсэн. Тэднийх мөнгө байхгүй гэсэн тайлбарыг өгсөн. Ямартаа ч өөрсдийнхөө нөөц бололцоогоор барилгаа барьж дуусгана гэж шийдээд өнөөдрөөс барилгын материалуудаа татаж эхэлсэн.  Ямартаа гүйцэтгэгч компанийн чанарын шаардлага хангаагүй барилга барьсан, ангиудыг буруу барьсан барилгын ажил удааширсан.

-Энэ цэцэрлэг хэчнээн хүүхэд хамрагдах вэ?
-100 гаруй хүүхэд суралцах боломжтой. Ямартаа ч барилгын ажил дуусч Улсын комисс хүлээж авсаны дараа бүртгэлээ хийж эхэлнэ.
Биднийг очиж сурвалжилж байхад иргэдээс энэ цэцэрлэг намар гэхэд ашиглалтанд орох болов уу гэсэн асуултыг их асууж байлаа. Учир нь энэ хавийн айлууд хүүхдүүдээ өгөх цэцэрлэг ойр хавьд нь тун ховор байдаг аж.
2013 оны 7 сарын байдлаар Баянзүрх дүүрэг нийт хүн амын тоо 90.277 мянгад хүрсэн байна. Нийт 28 хороотойгоос  9 нь харьяаллын цэцэрлэггүй байдаг аж. 28 хороонд 0-5 насны 25000 хүүхэд байгаагаас 10720 хүүхэд нь төрийн болон төрийн бус өмчийн мөн харьяаллын болон харьяаллын бус 82 цэцэрлэгт сурдаг байна.

Ингээд үзэхээр тус дүүргийн хувьд төдийгүй бусад дүүргүүд дээр ч сургуулийн өмнөх насны хүүхдүүдийн сургалт хүмүүжлийн асуудал нэлээдгүй хүнд нөхцөлд байгаа юм.
59 дүгээр цэцэрлэг: Ингээд тус дүүргийн 59-р цэцэрлэгээр ороход шал нь цөмөрч дөрөвдүгээр сард хаагдсан гэж байв.  Улмаар 2014 онд нураах шийдвэр гарсан учир энэ жил засвар хийх санхүүжилт хэрэгтэй байгааг цэцэрлэгийн ажилчид хэлж байв. Одоогоор санхүүжилт байхгүйгээс хийгдсэн ажил байхгүй байгаа юм. Тэгэхээр 59-р цэцэрлэгийн хүүхдүүд энэ жилээс цэцэрлэгтээ явж чадахгүйд хүрчээ.

10 дугаар цэцэрлэг: Мөн 10-р цэцэрлэг нураах шийдвэр хүлээгдэж байгаа.  Учир нь гал тогооны өрөөний засвар хийгдээгүй бөгөөд нэг ёсондоо гал тогоогүй байгаа аж.

6 дугаар цэцэрлэг: Ерөнхийдөө дээврүүдийг зассан байдалтай байна. Гэвч зарим нэг урсгал засвар хийгдээгүй. Мөн эрхлэгч тавигдаагүй байгаа гэнэ.

32-дугаар цэцэрлэг: Ерөнхийдөө урсгал засвараа хийсэн ч дээврээс ус орсны улмаас дотор таазны шохон унадаг засах санхүүжилт байхгүй байна.

8 дугаар цэцэрлэг: Урсгал засвараа хийсэн ч цонхнуудыг солих шаардлагатай байгааг хэлж байлаа. Мөн суултны улмаас шал цөмөрсөн, цахилгааны монтаж шинэчлэх санхүүжилт шаардлагатай байгаа гэв.