Монголын оёдолчдын холбооноос сурагчдын дүрэмт хувцастай холбогдуулан мэдээлэл хийлээ. Компаниудын дунд тендер зарлаж, сонгон шалгаруулалт явуулахгүйгээр нэр бүхий цөөн хэдэн том компанид сурагчдын дүрэмт хувцсыг оёх ажлыг даалгасан нь хууль зөрчсөн үйлдэл. Үгсэн хуйвалдсан тус үйлдлийг ШӨХТГ-аас буруутай гэж үзэн зөрчлөө арилгахыг шаардаж байхад одоо хүртэл зөрчлөө арилгалгүй ажлаа үргэлжлүүлэн хийж байгаа нь хууль бус гэж оёдолчдын холбооныхон үзэж байгаа аж. Мөн өнгөрсөн долдугаар сарын 26-ны өдөр ҮХААЯ-аас албан ёсоор хариу өгөхийг ШӨХТГ-аас шаардсан байхад одоог хүртэл хариу өгөөгүй байгаа нь төрийн хуулийг эс хүндэтгэсэн асуудал юм тэд хэлэв. Цаашлаад нийслэл болон хөдөөгийн сургуулиудтай гэрээ байгуулж, шинэ дүрэмт хувцсыг заавал авахыг шаардсан нь гэх энэ бүх үйлдлийн цаана ҮХААЯ-ны төрийн нарийн бичгийн дарга Х.Золжаргал байгаа гэдгийг хэлээд энэ үйлдлээ даруй засч, ШӨХТГ-ын шаардлагыг биелүүлэхийг шаардсан юм.
Монголын 30 гаруй мянган оёдолчин ажилгүй сууж байхад 1-2 том үйлдвэрт сурагчдын дүрэмт хувцас олгох ажлыг даалгасан нь дэндүү явцуу байна гэж тэд үзэж байгаа аж. Мөн оёдолчдын холбооноос Ерөнхийлөгчид шаардлага хүргүүлэхээр болсон байна. Тус шаардлагад энэ хууль бус үйлдлийг таслан зогсоох, ажилгүй байгаа оёдолчдыг ажилтай болгож өгөх талаар дурджээ.
Т.Энхэлээ
