Өнөөдөр НИТХ-аар  “Өргөө” зочид буудлын үйл ажиллагааг сэргээх асуудлыг хэлэлцлээ. Хурлаар хэл амтайгаар татан буугдсан уг нийслэлийн өмчит үйлдвэрийн газрын үйл ажиллагааг дахин сэргээхээр болсон юм. Харин цаашид “Өргөө” зочид буудалд ямар үйл ажиллагааг явуулах, өмч хувьчлалд оруулах эсэхийг  асуудлаар ажлыг хэсэг гаргахаар шийдлээ.

  Мөн энэ үеэр “Өргөө” зочид буудалд хөрөнгө оруулах төслийг хууль бусаар авсан “Хар дун” компаний өнгөрсөн хугацаанд оруулсан гэх 1,5 тэрбум төгрөгийн хөрөнгө оруулалтыг баталгаажуулах асуудлыг хэлэлцсэн юм.  Үүний дагуу НИТХ-ын тэргүүлэгч Ц.Энхцэнгэл “албан тушаалаа урвуулан ашиглаж “Өргөө” зочид буудлын хөрөнгө оруулалтын төслийг авч хийсэн нь тогтоогдсон байтал одоо хөрөнгө оруулсан мөнгийг нь эргүүлж өгөх асуудал байж болохгүй. Үүнийг хуулийн байгууллагаар дахин шийдүүлэх хэрэгтэй” гэсэн саналыг тавьсан юм.  Энэ саналыг НИТХ-ын тэргүүлэгчид дэмжиж “Хар дун” компанитай холбоотой хөрөнгө оруулалтын асуудлыг дахин шалгаж үзэхээр боллоо.

   “Хар дун” компани “Өргөө” зочид буудалд 75 хувьд нь буюу 1,4 тэрбум төгрөгийн хөрөнгө оруулалт хийх гэрээтэй байсан бөгөөд өнгөрсөн хугацаанд “Өргөө” зочид буудлын барилгад их засвар хийж 1,5 тэрбум төгрөгийн хөрөнгө оруулалт хийсэн хэмээн баталгаажуулж өгөхийг шаардсаар байгаа гэнэ. Мөн тухай бүрт нь хөрөнгө оруулалтаа баталгаажуулах журамтай ч тэр ажлууд нь хийгдээгүй  байна. Тиймээс дараагийн хурлаар энэ асуудлыг дахин хэлэлцэхээр боллоо.