Гэр хорооллын иргэд өөрийн амьдарч буй орчноо сайжруулах санаачлага гарган, эрүүл аюулгүй орчинд амьдрах боломжоо өөрсдөө бүрдүүлж  бүтээн байгуулалтын ажилд гар бие оролцож эхэлсэн.  Энэ ажлын эхлэлийг Захирагчийн гэр хороолол дахь ажлын албад хэрэгжүүлж байгаа. Өнөөдөр Захирагчийн Наран дахь ажлын албанаас санаачлан СХД-ийн 30-р хороонд гүний худгийг сэргээн засварлаж оршин суугчдад нь хүлээлгэж өглөө. Энэ арга хэмжээнд Хотын ерөнхий менежер Б.Бадрал, Азийн сангийн төлөөлөгч Тирза Тиниссен, ЗАА-ны Захиргаа, санхүүгйин хэлтсийн дарга Э.Энхцэцэг албаны бусад хүмүүс оролцсон. Энэ гүний худгийг сэргээн засварлахаар “Шинэ зуун гэр хорооллол” ТББ 2 жил хөөцөлдсөн боловч ажил хэрэг болоогүй. Харин Захирагчийн Наран дахь ажлын алба нааштайгаар хүлээн авч ЗАА—нд уламжилснаар Азийн сангийн “Гэр хорооллын иргэдийн санал санаачлагыг дэмжих сан”-гаас санхүүжүүлснээр ашиглалтанд оруулсан. Нээлтийн үеэр оршин суугчид “Гэр хороолол дундах энэ худаг бөглөрөөд 2 жил болсон учраас ашиглахаа болиод удсан, ажилгүйчүүд цугладаг газрын нэг байсан. Гэрийнхээ ойролцоо худагтай болж усан хангамжаа шийдсэндээ баяртай байна.  Сэргээн засаж ашиглалтанд оруулах сургаар  бид ажилд нь гар бие оролцсон. Төр засаг яг ийм ажилд хөрөнгө гаргах хэрэгтэй”  гэж байлаа.