Автозамын засвар, шинэчлэлтэй холбоотойгоор “Дархан минж”-ийн уулзвараас  "Нарантуул" худалдааны төв хүртэлх замыг өнөөдөр, маргааш хоёр өдөр засч, захын хойд талаас чигээрээ нэвтэрдэг болгохоор шийдвэрлэсэн билээ. Тэгвэл үдээс өмнө 11.00 цагийн байдлаар энэхүү шийдвэрийг эсэргүүцсэн “Нарантуул” олон улсын худалдааны төвийн худалдаачид бараа бүтээгдэхүүнээ лангуун дээрээ гаргаж тавин, хагас ажилласан байдалтай байлаа. Захын удирдлагын зүгээс түрээслэгчдийг лангуугаа хаахыг шаардаж байгаа ч тэд энэхүү шаардлагыг үл хэрэгсэн өнөө, маргааш хоёр ажиллана гэдгээ мэдэгдээд байна. Мөн өчигдөр орой замын ажилчид, цагдаагийнханыг оруулахгүй гэдэг үүднээс тэдний хэсэг наймаачид зах дээрээ хоножээ.

Худалдаачдын зүгээс энэхүү шийдвэрийг хууль бус үйлдэл гэж үзэж байгаа бөгөөд “Хоёр өдрийн дотор зам засна гэдэг бол худлаа. Энэ нь угтаа Дүнжингарав худалдааны төвийн нээлт болох гэж байгаатай холбогдуулан “Нарантуул” захын үйл ажиллагааг тасалдуулах зорилоготой “цаанаас” зохион байгуулж байгаа улс төрчдийн явуулга” хэмээн үзэж байгаа аж. Мөн “Нарантуул” худалдааны төвийн захиргааны үүдэнд “захыг хоёр өдөр хаах тухай” шийдвэрийг эсэргүүцэж буйгаа илэрхийлж хэдэн арван түрээслэгчид олноороо цугларан эсэргүүцлийн жагсаал өрнүүлээд байна.  Түүнчлэн дөнгөж сая "Нарантуул" захын түрээслэгчид сэтгүүлчдэд мэдээлэл хийлээ.

Түрээслэгчид иргэдийн ажлын байр, эрх ашиг ноцтой хөндөгдөж байна. Улаанбаатар хотын захирагчийн алба болон нийслэлийн засаг даргын хэлэлцүүлэгч агентлаг, өмчийн газраас "Нарантуул трейд" ХХК-д ирсэн мэдэгдлийг бид эрс эсэргүүцэж байна. Нарантуул зах дээр ойролцоогоор 15 мянга гаруй наймаачид ажилладаг. Гэтэл яг орлогын үед хоёр өдрөөр бидний ажлыг алдагдуулж байгаад бухимдаж байна. Энэ зах дундуур явж байгаа авто зам барих шийдвэрийг түрээслэгчид эсэргүүцэж өөрсдийн гарын үсэгтэй цаасыг манай үйлдвэрчний хороонд олноор ирүүлж байна хэмээн "Нарантуул" захын үйлдвэрчний хорооны дарга Ц.Мягмар онцоллоо.

Гутлын лангуу түрээслэгч Ш.Баттулга:  Дүнжингаравын нээлтээс болж Нарантуулыг хоёр хоног хаах гэж байна. Энэ замыг тавиулахгүй байх үүднээс түрээслэгчид бүхий л тэмцлийн хэлбрийг сонгоно

-Зам засварын ажилыг эсэргүүцээд байгаа юм уу, эсвэл хоёр өдөр ажлуулахгүй болсон нь түрээслэгчдийг бухимдуулаад байна уу?

-Аль алийг нь эсэргүүцэж байна. Ер нь бид үүнийг бодлогын чанартай зүйл гэж үзэж байна. Хоёр өдрийн дотор бүхэл бүтэн километр гаруй замыг тийм амархан засчихгүй.  Энэ бол зүгээр эрх баригчдийн зүгээс авч байгаа ээлжит заль гэж үзэж байна. Энэ зам бол нэгдүгээрт Нарантуулын харьяаллын газар. Тэгээд дээр нь энэ чинь хөдөө явдаг хоёр,  гурван мянган  машины зогсоол байрладаг газар.  Эндээс 18 аймаг, гурван хот руу ард түмний өргөн хэрэгцээний барааг зөөж байна. Мөн лангуугүй зарим нэг наймаачид гар дээрээс, эсвэл жижиг лангуу ажилуулж амжиргаагаа залгуулдаг. Улмаар тэрэг түрдэг хүмүүс, жимс чихэр зардаг наймаачид гээд тэднийг яах гэж байгаа юм бэ?. Хэцүү шүү дээ. Үүний цаана хүний амьдрал явагдаж байна. Нарантуул захын түрээслэгчдийн 80 орчим хувь нь банкны зээлтэй байдаг гэдгийг бодолцох хэрэгтэй.

-Өнөөдрийн нөхцөл байдал ямар байна?

-Байдал их хэцүү байна. Захыг хаана гээд зарлачихсан учир худалдан авагчид ирэхгүй байгаа. Зогсож байгаа хүмүүс байна урд хойд хаалган дээрээ зам хаасан маягтай зогсож байна. Яг түрээслэгчдийн бараа татдаг, жолооч нарыг зогсоолын газарт зам тавих гээд байгаа. Ерөнхийдөө энэ газар бол Нарантуулын ашигтай талбай.

-Энэ замыг барьсанаар өөр ямар хор уршиг учрах вэ?

-Адаглаад машины зогсоол, хөдөө орон нутагруу явах унаагүй энд байрлаж чадахгүй болно. Мөн зарим нэг наймаа хийдэг хүмүүс газаргүй болж, тэрэг түрж амжиргаагаа залгуулдаг эмзэг бүлгийн иргэдэд ч их хүндрэлтэй болох юм. Түүнчлэн Өргөтгөл, Зүүн хаалга хоёрын дунд баригдах энэ замнаас болж осол аваарч их гарахыг үгүйсгэхгүй. Учир нь энд тэрэгчдээс гадна наймаачид кантнерлуугаа бараагаа зөөх зэрэг асуудал их байдаг. Өөрөөр хэлбэл, өргөтгөл дотор наймаачдын барааг хадгалдаг кантнерууд байдаг. Тэгэхээр дунд нь зам тавьчихаад осол аваар ч их гарах юм. Ер нь бол энэ замын асуудлаа наймаачид, түрээслэгчидтэй эхлээд ярилцах хэрэгтэй байсан.  Жижиг бараа үйлчилгээ явуулдаг хүмүүс л гэхэд 350 гаруй нь яг энэ зам тавих гээд байгаа газарт байрласан байдаг. Мөн тухайн зам барих гэж байгаа газар өндөр хүчдэлийн шон байрласан байдаг. Ийм байхад зам барьж болох үгүйг бас судлах л хэрэгтэй байх.

"Нарантуул" захыг өнөө маргааш ажиллуулахгүй гэсэн урьдчилсан тогтоол шийдвэр, танилцуулах хуудас та бүхэнд албан ёсоор ирсэн үү?

-Захиргаанд бол өгсөн гэсэн. Гэвч бид их хожуу мэдсэн. Тухайн үед нь хэлж мэдэгдээгүй. Амьжиргаагаа залгуулж  өдрийн орлогоо эндээс олдог, зөвхөн 15,000 хүн биш тэдэн дээр чинь нэмэгдээд өчнөөн олон хүн бий. Нарийн ярьвал Улаанбаатар хотын хүн амын бараг тал хувь нь Нарантуул захын үйл ажиллагаа, түүний дам нөлөөгөөр амьдралаа залгуулж байна. Ийм байхад биднээс энэ тухай ингэх гэж байна, тэгэх гэж байна гэж урьдчилан асууж, тодруулалгүй ийм шийдвэрт гэнэт хүрсэнд бид эсэргүүцэж, гомдолтой байна.

-Зах хаасан үйл явдлыг Дүнжингарав худалдааны төв нээлтээ хийх гэж байгаатай зарим түрээслэгчид холбон ойлгож, цаанаасаа зохион байгуулалттай улс төрийн явуулга гэх мэтээр  ярьж байна. Энэ талаар та ямар  бодолтой байна?

-Яг үнэндээ нэлээн их хүмүүс ийм бодолтой байгаа. Өнөөдрийн жагсаал оролцож байгаа хүмүүс ч , мэдээлэл хийж байгаа бид нар ч. Нарантуулийг Ардын намын Сайхансамбуугийн зах  гэдгийг хүн бүр мэднэ. Гэтэл одоо энэ нээлтээ хийх гэж байгаа Дүнжингарав бол ардчилсан намын Наранхүү, Батлан хамгаалахын сайд Бат-Эрдэнэ гэх мэт хүмүүсийн өмч хөрөнгө. Аажимдаа энэ нь, зам гэдэг нэрийн доор захын үйл ажиллагааг эхний удаад хааж, Нарантуулыг бүр мөсөн үгүй хийх гэсэн эрх баригчдын авч хэрэгжүүлж байгаа явуургүй алхам  гэж ойлгогдож байна.

-Энэ захыг хоёр хоног хаахад хэчнээн төгрөгний хохирол түрээслэгчдэд учрахыг та нар тооцоолж үзсэн үү?

-Өч төчнөөн хүмүүс янз бүрийн наймаа хийдэг. Бүгд өөр өөр ашиг, орлоготой. Тэгэхээр наад зах нь 15 мянган түрээслэгчдийн хоёр хоногийн орлогын нийт хохирлыг тооцоход үнэхээр маш их юм. Дөнгөж сая бид холбогдох албаны хүмүүст шаардах бичиг хүргүүллээ. Бидний шаардлагыг үндсэндээ хүлээн зөвшөөрөхгүй байна. Яг энд зам барихаас өөр гарц зөндөө байгаагүй. Гэтэл халдвартын уулзвараас эхлээд зам тавьж, Нарантуулын хойд замыг засах боломж бүрэн байгаа шүү дээ.