Сонгинохайрхан дүүргийн АН-ын бүлгээс дүүргийнхээ ИТХ-ын хууль бус үйлдлийн талаар мэдээлэл хийлээ. Орон нутгийн сонгуулиар Сонгинохайрхан дүүрэгт  МАН олон суудал авсан. Үүгээр далимдуулан төсвийн мөнгийг дүүргийн удирдлагуудын өрөө тасалгааг засч, тохижуулах ажилд зориулж байгааг тэд буруутгаж байгаагаа онцоллоо.

 СХД нь  хүн ам олноор суурьшсан дүүрэг бөгөөд тус дүүрэгт эрчим хүчинд холбогдоогүй 4-5 мянган өрх байдаг байна. Төсвийн мөнгийг энэ ажилд зарцуулах  боломжтой байхад зөвхөн дүүргийн тамгын газрыг тохижуулах ажилд зарцуулж байгаа нь хууль зөрчсөн үйлдэл гэв. Төсвийн тодотгол иргэд рүү хандахаасаа илүү дарга нарын тав тухыг хангасан зүйлд зарцуулагдаж байгааг ч тэд мөн ярьсан юм.

Мөн тус дүүрэгт буруу шийдвэр тогтоол их  гарч байгааг энд дуулгалаа. Тухайлбал 2013 оныг СХД-ээс “Иргэдийн оролцооны жил” гэж зарласан байдаг. Гэтэл тус дүүрэгт шийдвэр гаргах түвшинд иргэдийг оролцуулах тал дээр хангалтгүй ажиллаж байгаа аж. Ерөнхийлөгч зарлиг гаргаж бүх дүүрэгт “Иргэний танхим” байгуулж,  дуу хоолойг нь сонсох ёстой гэсэн байтал энэ дүүрэгт иргэний танхимыг одоог хүртэл байгуулаагүй гэнэ. Цаашлаад иргэдийн хурлын төлөөлөгч нар цуглаж, хуралддаг өрөөг нь хоёр хуваагаад дарга нарын өрөө болгосон байна. Өнөөдөр тус дүүргийн ИТХ-ынхан хурлаа хийх өрөөгүй болжээ.

 Дүүргийн ЗДТГ-ын байрны гаднах пасадыг  засахад 64 сая төгрөгөөр засварлаж байгаа аж. Мөн бусад өрөө тасалгааг ч төсвийн мөнгөөр засч байгаа гэнэ. Гэтэл  төсвийн тодотголоор хийж байгаа ажлынхаа талаар оруулж ирсэн аж. Уг нь бол төсвийн тодотгол хийхээс өмнө тендер зарлаад, шалгарсан компани засварын ажлыг хийх ёстой. Гэтэл энд бүх хууль дүрэм эсрэгээрээ хэрэгждэг тухай тэд хэлэв.

Дүүргийн ИТХ орон нутгийн сонгуулиас хойш нийтдээ 130 шийдвэр, тогтоол гаргаад байгаа аж. Эдгээр шийдвэрүүдийг зөвхөн нэг л намын байр сууринаас хандаж гаргасан гэв.