Энэ долоо хоногт таван уулзварын засварын ажил дуусна гэж албаныхан хэлж байгаа. Эдгээрээс хамгийн түрүүлж ХӨСҮТ-ийн баруун урд байрлах “Дархан Минж”-ийн уулзварыг маргааш 11.40 цагт албан ёсоор нээхээр болжээ. Нээлтийн ёслолд Ерөнхий сайд болон Засгийн газар, бусад албаны хүмүүс оролцох аж.

Харин дараа нь Гурвалжингийн гүүрний урд байрлах Ажилчны гудамжны, Х хорооллын, Тасганы овооны, Бөхийн өргөөний уулзварууд дарааллан ашиглалтад орно. Одоогоор эдгээр уулзварт өргөтгөл, дэд бүтцийн ажлууд дуусах шатандаа орж, асфальт бетон хучилтаа тодорхой графикийн дагуу хийж байгаа. Мөн хучилт дууссан уулзваруудад гэрлэн дохио суурилуулах, авто замын тэмдэг тэмдэглэгээ хийх, явган зорчигчийн зам тавих, орчны бусад тохижилтын ажлуудыг хийж байна.

Ийнхүү таван уулзварын шинэчлэлийг дуусгаснаар 33 уулзварын 11 нь ашиглалтад орж байна гэсэн үг аж.

Үүнээс гадна I хорооллын арын замыг Гэмтлийн эмнэлгээс уруудах замтай шууд холбосон шинэ уулзвар гаргаж, өргөтгөх, III, IV хорооллын эцсийн, Циркийн, ТЭЦ-ийн, 25 дугаар эмийн сангийн уулзваруудыг өргөтгөн шинэчлэх, хөдөлгөөний ачаалал ихтэй тодорхой чиглэлүүдэд шинээр зам барих хэд хэдэн ажил хийгдэж байгаа юм.