Засгийн газраас энэ хичээлийн жилд ерөнхий боловсролын сургуулийн нийт сурагчдыг дүрэмт хувцас өмсүүлэх шийдвэр гарсан. Үүний дагуу  энэ жил ЕБС-ын 73 хувь буюу 373 мянга гаруй сурагчдад шинэ дүрэмт хувцас өмсгөх юм байна. Эдгээрээс Улаанбаатар хотод 141 мянга орчим сурагч, хөдөө орон нутагт 231 мянга гаруй сурагч шинэ дүрэмт хувцас өмсөнө. 

Улсын хэмжээнд нийт 728336 ширхэг дүрэмт хувцас нийлүүлэгдэх ёстой бөгөөд энэ ажил 119 оёдлын үйлдвэр цехүүдэд ид явагдаж байна.  Бага ангийн  тодруулбал 1, 2, 3 дугаар ангийн 111 мянган сурагчийн дүрэмт хувцсыг наймдугаар сарын 30 гэхэд,  үлдсэн 4, 5 дугаар ангийн хүүхдүүдийн 78 мянга гаруй хувцсыг есдүгээр сарын 15 гэхэд бэлэн болгох юм.

Харин дунд ангийн 126 мянган сурагчийн дүрэмт хувцсыг есдүгээр сарын 30 гэхэд, ахлах ангийн 56 мянга гаруй сурагчийн дүрэмт хувцсыг аравдугаар сарын 30 гэхэд бүрэн нийлүүлж дуусахаар төлөвлөөд байна. 

Шинэ дүрэмт хувцасны үнийг өнгөрсөн оны дүрэмт хувцасны ижил төрлийн хувцасны үнэтэй харьцуулахад 10-24 мянган төгрөгийн зөрүүтэй байгаа юм. Мөн сурагчдын шинэ дүрэмт хувцсыг авах боломжгүй айл өрхүүдийн судалгааг Нийгмийн хамгаалал хөдөлмөрийн яамтай хамтран хийж байгаа ч үнэгүй олгох сургаар боломжтой айлууд ч үүнд хамрагдахыг хичээж эхэлснийг салбарын сайд нь хэлж байлаа.