Хамгийн их хүн амтай дүүргүүдийн тоонд ордог Баянзүрх дүүргийн цэцэрлэгийн бүртгэл зарим нэг цаг үеийн асуудлын талаар Хөдөлмөр эрхлэлт, нийгмийн хөгжлийн асуудал хариуцсан Засаг даргын орлогч Т.Баясахаас  тодрууллаа.

-Цэцэрлэгийн бүртгэл хэдэн хувьтай явагдаж байна?
-Өнгөрсөн долоо хоногт цэцэрлэгийн бүртгэл эхэлсэн. Бүртгэлийн явцад ямар нэгэн хүндрэл, гомдол гараагүй байна. Манай дүүргийн хэмжээнд 6000 гаруй цэцэрлэгийн насны хүүхэд байгаа. Үүнээс урьдчилсан байдлаар 4000 орчим хүүхэд нь хамрагдана.  Төрийн өмчийн 29, хувийн 56 цэцэрлэг үйл ажиллагаагаа явуулж байгаа. Энэ жилдээ багтаж цэцэрлэгийн тоог өсгөхийг зорьж байгаа.

-Цэцэрлэгүүдийн засварын ажил дууссан уу?
-Засвар шинэчлэлийн 90 хувьтай явагдаж байна. Дүүргийн орон нутгийг хөгжүүлэх сангаас энэ жилдээ багтаж зургаан цэцэрлэг барихаар болсон. Манай нийт 28 хорооноос 10-н хороонд цэцэрлэг байхгүй. Иймд тус 10-н хорооноос зургаад нь шинээр цэцэрлэг барихаар болоод байна. Орон нутгийг хөгжүүлэх санд 4.4 тэрбум төгрөг төсөвлөсөн байгаа. Энэхүү мөнгийг иргэдийн санал дээр үндэслэн зарцуулна. Энэ ч хүрээд нийт 180 мянган иргэнээс онлайнаар болон бичгээр санал авсан. Үүний үр дүнд нэгдүгээр хийх ёстой ажил бол шинээр цэцэрлэг барих ёстой гэсэн байсан. Энэ хүрээнд гэр хорооллын дөрвөн хороо, орон сууцны хоёр хороонд канад технологи буюу хамгийн хурдан чанартай технологиор цэцэрлэг барихаар болсон.

-Эдгээр цэцэрлэгүүдийн барилгын ажил хэдэн хувьтай явагдаж байна вэ?
-Төсөв мөнгө нь тусгагдсан байгаа. Одоо тендер зарлана. Газар чөлөөлөх ажил явагдаж байна.
 
-Ирэх сарын хичээлийн шинэ жилээр танай дүүргийн бүх сургуулийн завсарын ажил дуусч амжих уу?
-Манай дүүргийн хэмжээнд улсын 21, хувийн 16 сургууль үйл ажиллагаагаа явуулж байна. Урсгал засвар 90 хувьтай явагдаж байна. Гэхдээ зарим шинээр баригдаж байгаа сургууль он дамжихаар болоод байна. Энэ жил нэгдүгээр ангид 4400 хүүхэд элсэнэ гэсэн урьдчилсан судалгаа гараад байна. Өнгөрсөн хавар 3000 орчим хүүхэд бүртгүүлсэн байсан.  Манай  дүүргийн 59 дүгээр цэцэрлэгийн барилгыг нураах шийдвэр гарсан.  Хэдийгээр энэ асуудал эрт яригдаж, шийдэгдсэн ч өнөөдөр  төсөв нь орж ирээд байна. Урсгал засвар маргаашнаас эхэлнэ.