II төрөх эмнэлэгт жил гаруйн өмнө кесерово хагалгаагаар төрсөн Э.Хонгорзул гэх энэ бүсгүй хариуцлагагүй эмч нарын буруугаас болж хагас жил гаруйн хугацаанд хэвтэрт байж, эмнэлэгээс эмнэлэг дамжин тарчилсан. Тодруулбал түүнд хийсвэр хагалгаа хийх явцдаа эмч нар нь метр гаруй урттай марлийг гэдсэнд нь үлдээсэн байсан юм. Бид өмнө нь энэ талаарх мэдээллийг дэлгэрэнгүй хүргэж байсан билээ.

Тэгвэл тэрээр өнгөрсөн зургадугаар сард Улсын нэгдсэн төв эмнэлэгт хэвтэн эмчлүүлж, гэдэс залгуулах хагалгаанд оржээ. Хагалгаа амжилттай болж Э.Хонгорзул хөл дээрээ боссон ба биед нь зүүлттэй байсан уутнаасаа салсан байна. Хагалгаанд орсноор тэрээр хоол ундаа хэвийн идэж ууж, гаргах ёстой газраар нь гаргадаг болжээ. Тэрээр эдгээд зогсохгүй "Да хүрээ" техникийн зах дээр ажлаа үргэлжлүүлэн хийж байгаа аж. Гэсэн ч удаан хугацаанд эм тариа хийлгэснээс болж дархлаа нь суларсан тэрээр байнга ханиад хүрсэн байдалтай байгаа гэнэ. Тэрээр хүүхдүүдийнхээ хичээлийн хэрэгслийг бэлдчихээд амралтанд сувилуулна гэв.  Ямартай ч тэрээр эрүүл саруул болгож өгсөн нэгдүгээр эмнэлэгийн эмч Ганбат, Ганзориг эмч, эмнэлэгийн ажилтнуудад баярлаад барахгүй байгаа гэв.

Харин Э.Хонгорзулын гэдсэнд марль үлдээсэн эмч нар ажлаасаа гарсан ч өөр газар ажиллаж байгаа сурагтай гэж тэрээр хэлсэн юм. Тэд Э.Хонгорзул бүсгүйд найман сая төгрөг өгөөд салъя гэж хэлсэн ч 2 сая төгрөг өгөөд сураг алдарсан байна. Мөн шүүх эмнэлэгээс Э.Хонгорзулыг метр гаруй марлийг өөрөө залгисан гэж тодорхойлоод хариуцлага алдсан эмч нарын хэргийг хэрэгсэхгүй болгосон билээ.