“Зэрлэг цэцэгсийн хүлэмж” киноны уран бүтээлчид өнөөдөр киноныхоо трейлер болон клипыг албан ёсоор нээж хэвлэлийн бага хурал хийлээ. Нээлтэд МУГЖ У.Уранчимэг, СТА Д.Ганцэцэг, залуу жүжигчин А.Ганчимэг, UBS music тв-ийн захирал П.Одгэрэл, Ардын дуу бүжгийн чуулгын гоцлол бүжигчин СТА М.Бямбаа нар оролцсон юм. Тус кино ирэх есдүгээр сарын 12, 13-ний дараалсан хоёр өдөр "Тэнгис", "Өргөө" кино театруудад нээлтээ хийх аж.
"Зэрлэг цэцэгсийн хүлэмж" киноны зохиолыг СТА Д.Ганцэцэг бичсэн бөгөөд МУГЖ У.Уранчимэг энэ тухай “Үнэхээр гайхамшигтай, хурдтай, хурц үйл явдалтай сайхан зохиол болсон. Киноны уран бүтээлийн хувьд нэгдүгээрт зохиол хоёрдугаарт ч зохиол л байдаг. Зохиол бол хамгийн чухал. Энэ киног бүтээх үр үндсийг бий болгосон Ганцэцэгийн маань зохиол кино болж хувирлаа. Үзэгч түмний сэтгэлд хүрнэ гэдэгт би итгэлтэй байна” гэлээ.
Харин ерөнхий найруулагчаар нь тус кинонд Цогзолмаагийн дүрийг бүтээсэн МУГЖ У.Уранчимэг ажиллажээ. Тус киноны дүрүүдийн хувьд үндсэн долоон дүрийн тав нь эмэгтэй бөгөөд эдгээрээс гурвыг нь шалгаруулалт явуулж сонгосон байна.  Гол дүрүүдэд Цогзолмаа- МУГЖ Д.Уранчимэг, Саарал-СТА Д.Ганцэцэг, Жоохноо- залуу жүжигчин А.Ганчимэг ,  Яргуй- Ардын дуу бүжгийн чуулгын гоцлол бүжигчин СТА М.Бямбаа, Бат-Эрдэнэ- залуу жүжигчин н.Энхтүвшин, Чингис- КУДС-ын гуравдугаар дамжааны оюутан н.Мөнхболд нар тоголсон гэнэ.
Мөн энэ кинонд зориулан нэгэн сайхан дууг бүтээсэн бөгөөд аяыг СГЗ Л.Балхжав, үгийг  П.Одгэрэл нар бичжээ. Энэ дуу МУГЖ У.Уранчимэгийн төрсөн дүү У.Уранцэцэг болон залуу дуучин Агиймаа,  Маралжингоо нарын дуулснаар олны хүртээл болох нээ. У.Уранцэцэг нь дэлхийд монголынхоо нэрийг гаргаж яваа дуурийн дуучин бүсгүй юм.  
Энэ кино нь “Хувьсал” продакшны дэлгэцийн анхны уран бүтээл болж байгаагаараа онцлог бөгөөд “UB Film” кино группын ерөнхий зураглаач Б.Отгонзоригийн баг зураг авалтыг  нь хийсэн байна. Киноны зураг авалтыг дэлхий түвшинд кино бүтээдэг “Red One” камераар хийжээ.
Тус кинонд 1981 оны үйл явдал гарах бөгөөд энэ киногоор нийгмийн харилцаа өөрчлөгдөж, зах зээлийн эдийн засгийн шилжих явцад хүмүүс бие биенээ хайрлан хүндэтгэх, хүн ёсны зан үйлээс холдож байгаа өнөө үед хүний дотоод сэтгэл, хүн чанар, сэтгэлийн их тэнхээ, хүн хүнээ дээдлэх ариун нандин ёс хичнээн чухал болохыг харуулсан гэдгийг тус киноны уран бүтээлчид хэлж байлаа.
Мөн энэ киноны нээлтийн тухай дэлгэрэнгүй мэдээлэлийг ирэх сарын 9-нд болох хэвлэлийн бага хурлаар өгөх аж.