"Нарантуул” худалдааны төвийн түрээслэгчидтэй Баянзүрх дүүргийн Засаг дарга Д.Пүрэвдаваагаар ахлуулсан ажлын хэсэг, “Нарантуул” төвийн удирдлагууд нөхцөл байдалтай холбоотойгоор уулзаж мэдээлэл хийсэн байна.

“Нарантуул” олон улсын худалдааны төвийн битүү дээвэртэй хүнсний бүтээгдэхүүн худалдаалдаг павильонд  гал гарснаар их хэмжээний хохирол учирч, хүний амь нас эрсэдсэн. Өчигдөр хэргийн газар Онцгой байдлын 650 гаруй албан хаагч ажилласан байна. Шатсан объектод их хэмжээний гал гарч, багагүй хохирол учирсан бөгөөд зоорийн давхарт 30 метрийн цөмрөлт үүсчээ. Хамгаалалтад буй объектод одоогоор нийслэлийн аврах багийн 30 гаруй аврагчид ажиллаж байна. Мөн 100 гаруй мөрдөн байцаагч, шинжээчдийн баг ажиллаж буй юм. Шатсан объектод лангуу түрээсэлж байсан түрээслэгчдийг хохирогчоор тогтоогоод байгаагаас тэднийг иргэний нэхэмжлэлээр тогтоон ажиллаж байна. Мөн дээрх хохирогчдоос найман хүний бүрэлдэхүүнтэй төлөөллийг хөндлөнгийн гэрчээр оруулжээ. Одоогоор эмх замбараагүй байдал үүсгэхгүйн үүднээс задгай захад үйлчилгээ явуулж байсан түрээслэгчдийг хэсэг хэсгээр дотогш оруулан өөрсдийн барааг авахыг зөвшөөрчээ.