Хичээлийн шинэ жил эхлэх гэж байгаатай холбогдуулан замын хөдөлгөөний ачааллыг бууруулах зорилгоор тээврийн хэрэгслийн улсын дугаарын сүүлчийн орныг тэгш, сондгойгоор нь ялган хөдөлгөөнд оролцуулж байгаа билээ.

Тодруулбал энэ сарын 24, 26, 28, 30-ны өдрүүдэд тэгш тоогоор төгссөн дугаартай тээврийн хэрэгсэл, харин 25, 27, 29, 31-ний өдрүүдэд сондгой тоогоор төгссөн дугаартай тээврийн хэрэгсэл 07.00-21.00 цагийн хооронд тогтоосон хязгаарлалтын бүсэд замын хөдөлгөөнд оролцохгүй юм. Ийнхүү хязгаарлалт хийж байгаа ч хотын төв хэсгийн замын түгжрэл буурахгүй байгаад иргэд шүүмжлэлтэй хандаж байгаа. Тэгвэл энэ нь жолооч нар янз бүрийн арга заль хэрэглэх болсонтой холбоотой гэнэ. Тухайлбал өөр улсын дугаар сольж хөдөлгөөнд оролцох, тээврийн хэрэгслийн улсын дугаарын сүүлийн оронг будах зэрэг олон арга хэрэглэх болсон байна. Бүр сүүлдээ арга нь улам нарийсч автомашиныхаа улсын дугаарыг гялгар уутаар  халхлаад явдаг болжээ.