Уг сургалтад ажилгүй болон ажилгүйдэлт өртөх магадлалтай хүн, мэргэжлээ солих хүсэлтэй иргэн, хөгжлийн бэрхшээлтэй иргэд хамрагдах боломжтой юм байна. Мөн зургаан сараас дээш хугацаагаар ажил хайж байгаа хүмүүс болон сургуулиас завсардсан залууст хамгийн тохиромжтой сургалт гэдгийг албаныхан онцоллоо.

Тиймээс ажилгүй байгаа хүмүүс үнэ төлбөргүй, богино хугацааны сургалтад хамрагдан мэргэжилтэй ажилтан болох боломж нь нээгдэж өгч байна гэсэн үг юм. Цаашлаад мэргэжлийн сургалтыг төгссөн хүнийг ажлын байранд зуучилж өгөх юм байна.

 Хөдөлмөр эрхлэлтийг дэмжих сангийн хүрээнд явагдаж буй уг сургалтад хамрагдахын тулд өргөдөл бичин, хорооны засаг даргаас тодорхойлолт авч, харъяа дүүргийнхээ Хөдөлмөр эрхлэлтийн хэлтэст хандах аж.

Иргэд ажиллахыг хүссэн мэргэжлээ сонгоод сургалтад сууж, 30 хувийн онол үзэж, 70 хувийн дадлага хийсний дараагаар цалинтай ажилдаа томилогдох юм байна.  Дадлага хийх явцад хоол, унааны мөнгийг захиалагч байгууллагаас өгөх аж. Үүний дараагаар мэргэжлийн үнэмлэхтэй болж төгсөх юм байна. Хүмүүс заавал эдийн засагч, инженер байх албагүй. Харин дунд мэргэжлийн мэргэжилтэн болох оёдолчин, барилгачин, гагнуурчин, цахилгаанчин, технологич, тогооч гэх  мэргэжил нийгэмд эрэлт хэрэгцээтэй байна гэж Нийслэлийн хөдөлмөрийн газраас мэдэгдлээ. Дэлхийн олон улс орон дээд мэргэжилтэй боловсон хүчнээс татгалзаж, мэргэжилтэй ажилтан бэлтгэх бодлогод анхаарлаа хандуулж хөгжиж ирсэн түүхтэй.