Энэ сарын 23-ны өдөр "Нарантуул" худалдааны төвийн хүнсний зах нь бүхэлдээ шатаж, 300 гаруй түрээслэгч хохироод байгаа билээ. 1999 оноос хойш үйлчилгээ эрхлэх зөвшөөрөлгүй үйл ажиллагаагаа явуулж ирсэн гэх тус захын түрээслэгч нар одоо "Нарантуул" захын удирдлага, УИХ-ын гишүүн асан Ш.Сайхансамбуугийн шийдвэрийг л хүлээж суугаа гэнэ. Ш.Сайхансамбуу гал гарснаас хойш захын энэ хэсгийг дахин ажиллуулах хүсэлгүй байна гэдгээ мэдэгджээ. Харин нийт түрээслэгчид хурдан павильоныг өргөтгөж, шинээр барьж өгөөч гэсэн хүсэлтийг хүргүүлэхэд тэрээр "Та бүхэн хүсч байгаа бол гурван сарын дотор сэргээн барья, та бүхэнтэй хамтарч ажиллахад сайхан байна" гэсэн хариуг илгээжээ. Хэрвээ энэхүү тохиролцоо биелэлээ олбол дөрвөн давхар шинэ барилгын ажлыг эхлүүлэх юм байна. Мөн гал гарах үеэр түрээслэгч, түрээслүүлэгчийн хооронд хийгдсэн бүх гэрээ шатжээ. Ямартай ч "Нарантуул"-ын түрээслэгчид павильоноо хурдхан босгож эргэлтийн мөнгө гаргаж өгвөл заавал бүх хохирлоо барагдуул гэж шахахгүй гэцгээж байгаа аж. Ер нь хийгээд захын удирдлагуудын хооронд нөхөн төлбөрийн асуудал босох гэнэ. Гал гарсан шалтгааныг маргааш гэхэд тодорхой болгоно гэж мэргэжлийнхэн хэлж байгаа аж.