Үндэсний номын сангийн шинэ байрны барилгын суурийг ирэх сард тавихаар төлөвлөж байгааг тус номын сангийн удирдлагууд хэлж байна. Одоогоор тус номын сангийн шинэ байрны зураг төсөл бэлэн болсон бөгөөд барилга барихтай холбоотой бүх зөвшөөрлийг авч дуусчээ. Ингэснээр энэ ажлыг мэргэжлийн комиссын хурлаар оруулж, барилгын ажлын тендер зарлах ажил л үлдсэн юм байна.

Хэрэв барилгын ажил төлөвлөгөөний дагуу явбал хоёр жилийн дараа манай улс орчин үеийн дижитал номын сантай болно. Тодруулбал заавал номын санд сууж ном унших биш хаанаас ч номыг интернэтээр татаж аваад унших боломжтой болох юм. Мөн аудио, видео номын сангийн тасаг, гэр бүлээрээ уншихад зориулсан гэр бүлийн үйлчилгээний тасаг ч байгуулахаар төлөвлөжээ.

Дашрамд дуулгахад Үндэсний номын сангийн барилга анх 1947 онд баригдсан бөгөөд тухайн үедээ нийт 500 мянган номтой байхаар тооцоолсон аж.  Гэтэл одоо дөрвөн сая номтой, түүний нэг саяыг нь овор хэмжээ, жин ихтэй ном судар эзэлдэг байна. Барилгын насжилт өндөрсөж, чанар муудсанаас үнэ цэнтэй ховор ном бүтээлийг хадгалахад хүндрэлтэй болсон төдийгүй мэргэжлийн хяналтын байгууллагаас хоёр ч удаа ашиглахгүй боломжгүй гэсэн дүгнэлт гаргасан юм байна. Мөн уншлагын хоёр танхимтай ч нийтдээ 240 хүний суудалтай учраас ачаалал ихтэй үед суудал хүрэлцдэггүй зэрэг олон хүндрэлтэй асуудлууд тус номын санд байгаа.