Шинэ Зеланд улсын Фонтеррад үйлдвэрийн зарим нэр төрлийн бүтээгдэхүүнээс хортой нянгийн бохирдол илэрсэн талаар бид өмнө нь мэдээлж байсан. Ингэхдээ манай улсад биш гадаадын хэд хэдэн оронд илэрсэн юм.

Гэхдээ манай улс тус үйлдвэрээс хуурай сүүнийхээ 90 орчим хувийг авдаг учраас нянгаар бохирдсон бүтээгдэхүүн Монголд нэвтэрсэн байж болзошгүй хэмээн үзэж, холбогдох байгууллагуудаас шалгалт явуулсан
 байна.
Ялангуяа нярай болон бага насны хүүхдүүдийн сүүн тэжээлийн найрлагад ордог хатаасан шар сүүний уургийн бэлдмэлээс уг нян илрээд байгаа. Тиймээс дэлхийн улс орнууд уг хатаасан шар сүүний уургийн бэлдмэлд шинжилгээ хийж, илэрсэн тохиолдолд зах зээлээсээ татаж эхлээд байгаа аж.

Хүнсний бүтээгдэхүүний аюулгүй байдлыг хангах хуулинд зааснаар эрсдэл гарсан тохиолдолд МХЕГ-аас эрсдэлийн үнэлгээг яаралтай хийж,  үнэлгээндээ тулгуурлаж тухайн бүтээгдэхүүнийг зах зээлээс эргүүлэн татах арга хэмжээг авч хэрэгжүүлэх ёстой. Энэ дагуу эрсдлийн үнэлгээг МХЕГ-аас хийж дуусчээ.

 Манай улсад тус үйлдвэрүүдийн бүтээгдэхүүнийг худалдаж байгаа эсэх, мөн нянгийн бохирдолтой бүтээгдэхүүн илэрсэн талаар МХЕГ-аас өнөөдөр мэдээллээ.

МХЕГ-аас дотоодын нэр бүхий 4 үйлдвэрийн 48 бүтээгдэхүүнээс дээж авч лаборторийн шинжилгээнд хамруулжээ.
Шинжилгээний дүнгээс харахад  нянгийн бохирдолтой гэх бүтээгдэхүүн илрээгүй байна. Мөн хүнсний аюулгүй байдлын чанарын шаардлагыг хангасан байсан гэв.

 АПУ, Витафит, Тэсо гэсэн гурван компани Фонтерра компаниас хатаамал сүүг авдаг байна. Гэхдээ тус компаниудаас нянгаар бохирдсон бүтээгдэхүүн илрээгүй байна.

Энэ нь манай улсад нянгийн бохирдолтой хүүхдийн сүүн тэжээл болон, хатаамал сүү орж ирээгүй байна гэсэн үг юм.
 
Анхааруулахад ард иргэд сүү, сүүн бүтээгдэхүүнийхээ худалдан авалтад анхаарал хандуулж, гадуур зарагдаж байгаа тохиолдолд МХЕГ-т мэдээлэхийг санууллаа. Цаашид МХЕГ-аас энэ төрлийн бүтээгдэхүүнийг хил гаалиар оруулж ирэх ажилд хатуу, чанга хяналттай ажиллана гэлээ.

Фонтерра компанийн хүүхдийн сүүн тэжээл бэлтгэдэг компанийн нэрийг дурдвал, БНХАУ-ын Dumex Baby, Wahaha хүнсний үйлдвэр, АНУ-ын Окланд мужийн Vitaco Healt групп, БНХАУ дахь Coco-Cola болон Frances Danone компанийн салбар үйлдвэрүүд, Шинэ Зеландын NZAgbiz малын тэжээлийн үйлдвэр зэрэг юм.

Гадны улсуудад илрээд буй ботулизм гэх энэ нян нь хүний мэдрэлийн системд нөлөөлж, булчин саажуулан улмаар амьсгал боосноор хүний эрүүл мэндэд асар муу нөлөө үзүүлдэг, үхлийн тохиолдол өндөртэй өвчин аж. Ботулизм нянгаар бохирдсон хүнсийг хэрэглэснээс хойш 18-36 цагийн дараа нүд бүрэлзэх, хэл яриа гацах, залгих боломжгүй байх, булчин сулрах зэргэ эхний шинж тэмдгүүд илэрч эхэлдэг байна.