Нийслэлийн хэмжээнд нэгдүгээр ангийн сурагчдын дүрэмт хувцсыг маргаашнаас эхлэн эцэг эхчүүдэд худалдаалах гэж байна. Энэ асуудлаар Бодлогын хэрэгжилтийг зохицуулах газрын дарга Д.Эрдэнэчимэгтэй хэдэн хором ярилцсан юм.

-Шинээр нэгдүгээр ангид элсэн орж байгаа хүүхдүүд маргаашнаас эхлэн дүрэм хувцсаа авах гэж байна. Тэгэхээр энэ ажлыг хэрхэн зохион байгуулж байгаа вэ?
-Маргаашнаас эхлэн энэ сарын 31-нийг дуустал Улаанбаатар хотын нэгдүгээр ангийн захиалга өгсөн бүх сурагчдын дүрэмт хувцсыг хүлээлгэж өгөх, борлуулах ажлыг зохион байгуулах гэж байна. Улаанбаатар хотод нийтдээ 16 борлуулалтын цэг ажиллаж ЕБС-ын сурагчдын дүрэмт хувцсыг худалдаална. Энэ ажлыг шуурхай, хүндрэлгүй зохион байгуулахын тулд маш олон талын арга хэмжээ авч байна. Тухайлбал энэ борлуулалтын цэгүүд өглөөний 08.00 цагаас оройн 21.00 цаг хүртэл уртасгасан цагаар ажиллана. Аль сургууль хэдний өдөр, хаана ямар цагын хугацаанд хүүхдүүдийнхээ хувцсыг авах вэ гэдэг хувиарыг гаргасан байгаа. Манай сургуулиуд дүүргийн боловсролын газрууд хүүхдүүдийнхээ дүрэмт хувцсыг авахтай холбоотой бүх мэдээллийг эцэг эхчүүдэд хүргэх ажлыг зохион байгуулж байна. Мэдээллийн хэрэгслүүдээр бас дүрэмт хувцасны олголттой холбоотой ажлыг шуурхай зарласан.

-Дүрэмт хувцас худалдан авч байгаа эцэг эхчүүдэд ямар нэгэн хүндрэл бэрхшээл гарвал яах вэ?
-Эцэг эхчүүдэд ямар нэгэн хүндрэл бэрхшээлгүй байхад онцгой анхаарч байгаа. Тухайлбал манай сургуулиуд болон дүүргийн боловсролын газрын холбогдох хүмүүс бүх сургуулиуд дээр ажиллаж дүрэмт хувцас сонгох,  төлбөр тооцоо хийхтэй холбоотой бүхий л ажилд нь тусална.

-Эцэг эхчүүд хүүхдийнхээ дүрэмт хувцсыг авахаар ирэхдээ ямар бэлтгэлтэй ирэх вэ?  
-Бидний зүгээс эцэг эхчүүдийг дөрвөн зүйл дээр анхаараасай хэмээн хүсч байна. Хүүхдийнхээ хувцсыг заавал аваарай хүүхэдтэйгээ хамт ирээд өмсөж тааруулж үзээд аваарай. Мөн дээрээс нь хүүхдийнхээ регистрийн дугаарыг мэдэж ирэх шаардлагатай. Хаан банк төлбөр тооцоог авах ажил дээр хамтран ажиллаж байгаа. Ингэхдээ энэ 16 борлуулалтын цэг дээр Хаан банкны теллерүүд ажиллана. Өөрөөр хэлбэл хэрэглэгчид дүрэмт хувцас хүлээж авсан тэр газраасаа төлбөр тооцоогоо шууд хийх бололцоог хангаж өгсөн. Эцэг эхчүүд бэлэн мөнгөөр тооцоо хийхээс гадна картаар хийж болно.

-Хөдөө орон нутгийн нэгдүгээр ангийн сурагчдын дүрэмт хувцсыг хэзээнээс нийлүүлж эхлэх вэ?
Орон нутгийн нэгдүгээр ангийн сурагчдын дүрэмт хувцсыг ирэх есдүгээр сарын 10 гэхэд нийлүүлж дуусахаар төлөвлөсөн.

-Шинэ сурагчдын дүрэмт хувцсыг заавал өмсөх албагүй гэж байсан. Гэтэл нэгдүгээр сургууль бүх сурагчдаа дүрэмт хувцас өмсөхийг шаардаж байгаа гэсэн?
Манай яамнаас шинэ дүрэмт хувцсыг заавал өмсөх болон бүгдийг нь өмсөх ёстой гэсэн шийдвэр гаргаагүй. Хуучин дүрэмт хувцсаа өмсөх эсвэл шинэ дүрэмт хувцсаа өөр төрлийн хувцастай хослуулан өмсөж болно гэсэн байгаа. Харин тэр бүх сурагчид өмсөх үү үгүй юу гэдгийг тухайн сургуулийн удирдлагууд багш сурагчид нь хэлэлцээд шийдэх боломжтой.