Ирэх даваа гараг буюу 9 дүгээр сарын 2-ноос эхлэн дүрэм зөрчиж нэгдүгээр эгнээнд автомашинаа тавьсан жолооч нарын автомашиныг  ачин журамлаж  байхаар болжээ.

Ингэснээр замын хөдөлгөөний ачаалал буураад зогсохгүй аюулгүй байдлыг хангаж иргэдэд замын хөдөлгөөний ухамсар соёлыг дээшлүүлэх чухал ач холбогдолтой гэнэ.

Энэ ажлыг эхлүүлэхийн тулд Замын хөдөлгөөний удирдлагын төв тусгай зориулалтаар тоноглогдсон гурван төрлийн ачигч, чирэгч автомашин төсвийн хөрөнгөөр авчээ. Өнөөдрийн байдлаар найман ачих машин ажилдаа гарсан байна. Үүн дээр нэмж дөрвөн ачигч машин ирэх гэнэ.
Замын хөдөлгөөний дүрмийг  зөрчсний торгууль,  дээрээс нь машиныг  ачсаны зардлыг нэмж төлнө. Ингэхдээ тухайн автомашины овор хэмжээ, моторын багтаамжаас хамаарч  өөр  өөр үнэ тариф тогтоох гэнэ.
Нэгэнт ачигдсан автомашинуудыг журмын хашаа байлгах бөгөөд иргэд ачуулсан автомашинаа хаанаас авах тухай мэдээллийг 7000 4455, 102 дугаарын утаснаас авах боломжтой аж.