Шинэ жил эхлэхтэй холбогдуулан Нийслэлийн Засаг даргын 2013 оны А/516 тоот захирамжийн дагуу улсын төсөв болон бусад хөрөнгө оруулалтаар барилга, сантехникийн засвар хийгдэж байгаа өрөнхий боловсролын сургууль, цэцэрлэг, оюутны дотуур байрны эрүүл ахуйн нөхцөл, барилгын засвар үйлчилгээний чанар, багшлах боловсон хүчин, ном сурах бичгийн хангамжийн байдалд НМХГ-аас хяналт шалгалт хийжээ. Шалгалтын талаар НМХГ-ын дэд дарга М.Баасандоржоос асууж тодрууллаа.

-Шалгалтанд хэчнээн сургууль, цэцэрлэг хамрагдав?
-Улсын төсөв болон бусад хөрөнгө оруулалтаар барилга, сантехникийн засвар хийгдэж байгаа 33 ЕБС, 44 цэцэрлэг, цэцэрлэгүүдийг хоол хүнсээр хангадаг  таван хангамжийн төв, оюутны 6 дотуур байр нийт 88 байгууллага хамрагдаж, шалгалтын явцад илэрсэн зөрчлийн 50%-ийг газар дээр нь арилгуулж, хичээлийн шинэ жилийн бэлтгэл ажлыг яаралтай хангах, их засварын ажлын гүйцэтгэл, холбогдох хууль тогтоомжийг мөрдөх талаар сургууль, цэцэрлэгийн захирал, эрхлэгч, холбогдох ажилтнуудад зөвлөгөө өглөө. Зөрчил дутагдлыг арилгуулж шалгалтын мөрөөр зохиох ажлыг эрчимжүүлэх чиглэлээр нийт 19 байгууллагад (СХД-ийн 62, 65, 67, БЗД-ийн 55, 88 ЧД-ийн 57, СБД- ийн 1, 29-р сургууль, СХД-ийн 106, 113, 119, 79, 148, БНД-ийн 131, 132 дугаар цэцэрлэг, Хүнс хангамж төв, Өсвөр үе НӨҮГ,) 59 заалт бүхий улсын байцаагчдын хамтарсан албан шаардлага өгч, БЗД-ийн 10-р цэцэрлэгийн хоол үйлдвэрлэлийн талаар улсын байцаагчийн дүгнэлт гаргасан.

-Шалгалтаар илэрсэн зөрчлүүд юу байв?
-2013-2014 оны хичээлийн жилд барилга нь ашиглалтын шаардлага хангахгүй байгаа тухай улсын байцаагчийн дүгнэлттэй таван цэцэрлэг,  дөрвөн сургуулийн барилгыг актлах Нийслэлийн Иргэдийн Төлөөлөгчдийн хурал, Нийслэлийн Засаг даргын захирамжаар буулгах болсон. Шалгалтанд хамрагдсан сургууль, цэцэрлэгийн засварын ажлын явц дүүрэг бүрт харилцан адилгүй явж байгаа бөгөөд нийслэлийн хэмжээнд гүйцэтгэл 79 хувьтай байна. Үүнээс  таван цэцэрлэгийн засварын ажлын санхүүжилт оройтсоноос засварын ажлыг ирэх сарын 1-нээс өмнө дуусгаж сургалтын үйл ажиллагаа эхлэх боломжгүй байна.

-Хүүхдийн тооны хувьд ?
-Шинээр сургууль, цэцэрлэгүүдийг барьж ашиглалтад оруулж байгаа боловч сургууль, цэцэрлэгийн нэг бүлэгт суралцах хүүхдийн тоо их, хүчин чадпаасаа 1,7-2,0 дахин их суралцагчидтай байсаар байна.

-Өөр ямар зөрчил илрэв?
-Шалгалтанд хамрагдсан зарим цэцэрлэг, сургуулийн эдэлбэр газарт барилга барьж, газар олгож байгаа нь биеийн тамирын талбайд хичээл орох бололцоогүй болгон, нэг хүүхдэд ногдох эдэлбэр газрын хэмжээ эрүүл ахуйн нормоос багасч, байгууллагын орчин, хөрсийг бохирдуулах нөхцлийг бүрдүүлж байгаа нь хүүхдийн эрүүл аюулгүй орчинд сурч боловсрох эрх зөрчигдөж байна. Мөн хэсгийн болон зөөврийн усан хангамжтай сургууль, цэцэрлэгүүдийн хувьд ундны усаа нөөцлөөгүй, хэсгийн шугам хоолойг халдваргүйжүүлээгүй байгаа нь унд ахуйн уснаас шинжилгээний дээжийг бүрэн хамруулах авах боломжгүй байна.

-Тэгэхээр 5 цэцэрлэг болон 4 сургуулийн засвар одоо хүртэл дуусаагүй байгаа гэсэн үг үү?
-Үндсэндээ 9 сургууль, 6 цэцэрлэг, нэг  ЕБС-ын дотуур байрны засварын ажил дуусаагүй байна.  Эдгээр газар хичээлийн шинэ жилийн нээлт хийх боломжгүй.  Өөрсдийн харьяа сургуулиуддаа хүүхдүүдээ түр оруулах байх. Мөн хичээлийн шинэ жилээ ч аргалаад нээх л биз. Эдгээр газруудын засвар 11 сар гэхэд дуусна гэж байгаа.

-Тухайлбал ямар сургууль, цэцэрлэгүүд хичээлийн шинэ жилийн нээлтээ ч хийж чадахгүй, хүүхдүүдээ ч авч чадахгүйд хүрээд байна вэ?
-Баянзүрх дүүргийн 10, 146 дугаар цэцэрлэг , 57, 92 дугаар сургууль мөн Баянгол дүүргийн 47, 57, 38, 73 дугаар сургууль, Сүхбаатар дүүргийн 11, гуравдугаар сургуулиуд байгаа. Түүнчлэн Чингэлтэй дүүргийн 5, 57 дугаар сургуулиуд багтаж байна.

-Сурах бичиг тараах ажлын явц хэдэн хувьтай явж байна?
-2013-2014 оны хичээлийн жилд 11,12 жилийн сургалтын нийт 87 нэр төрлийн сурах бичгийг шинэчлэн хэвлүүлж, 1-5 дугаар ангийн сурах бичгийг 100 хувь, дунд, ахлах ангийн сурах бичгийн 40 хувийг сургуулийн номын сангаар дамжуулан олгохоор дүүргүүдийн Боловсролын хэлтэс татан авч, сургуулиудад тараах ажлыг зохион байгуулж байна.  Сурах бичгийг сургуулиудад ирэх сарын 1-ний өдөр гэхэд бүрэн татан авч сурагчдын гар дээр олгогдож дуусна. Дүүргүүдийн дунджаар сурах бичиг тараах ажлын явц 85 хувьтай байна.

-Багш, нийгмийн ажилтнуудын сонгон шалгаруулалт хэрхэн явагдсан бол?
-Нийслэлийн хэмжээгээр нийт ЕБС, СӨББ-ын багш, нийгмийн ажилтан, сургалтын менежерийн сонгон шалгаруулалтыг дүүргүүдийн Боловсролын хэлтсийн ажлын хэсэг зохион байгуулан явуулсан. Сонгон шалгаруулалтанд 574 багш тэнцэж, сул ажлын байруудад ажилд орохоор бүртгэгдээд байгаа.

-Сургууль, цэцэрлэгүүд хичээлийн шинэ жилийг угтаж ямар ажил зохион байгуулж байна вэ?
-Тухайлбал, Сүхбаатар дүүргийн боловсролын хэлтэс нь 2013-2014 оны хичээлийн шинэ жилийн ажлын хүрээнд дүүргийн ерөнхий боловсролын сургууль, цэцэрлэгүүдийн багш нарын бага хурлыг өнөөдөр “хүүхдийн ордон”-д хийхээр бэлтгэл ажлыг хангасан байна лээ. Мөн хүүхдийн эрүүл мэнд, осол аюулгүй байдлыг хангахад анхаарч сургуулиудын автобусыг техникийн үзлэгт хамруулах ажил хийгдэж байгаа. Дүүргийн хэмжээнд баталгаажих түвшингээс доогуур орлоготой 475 хүүхдийн судалгааг гаргаж, эдгээр хүүхдүүдэд хичээлийн хэрэглэл цүнх түгээхээр бэлтгэсэн байна.

-Цэцэрлэг сургуулийн гал тогооны бэлтгэл хэрхэн хангагдаж. Адаглаад хоол хүнснийхээ зүйлийг цуглуулж чадаж уу?
-Хүнсний түүхий эд материалыг хүлээн авах тусгай өрөө, тавиур, мах ногооны агуулах,  бусад тоног төхөөрөмжөөр хангагдсан байсан. Хан-Уул дүүргийн 28, 29, 71 дүгээр цэцэрлэгүүдэд хүнсний агуулахын өргөтгөл засвар хийгдсэн боловч гал тогооны засвар дуусаагүй байгаагаас хүнс татан авалт хийгдээгүй байна.

Мөн Багануур дүүргийн 131, 132, 138-р цэцэрлэгүүдийн салбар 4 гэр цэцэрлэгүүдийн хоол үйлдвэрлэлийн технологи урсгал буруу, түүхий эд бүтээгдэхүүн хадгалах зориулалтын агуулахгүй байна. Ихэнх цэцэрлэгүүдийн хувьд хүнсний бүтээгдэхүүнийг түр хадгалах зориулалтын агуулахтай байлаа.

-Хоолын газрын мэргэжлийн боловсон хүчний хангалт хэр байв?
-Сургууль цэцэрлэгүүд нь 1-2 мэргэжлийн буюу мэргэшсэн хүний нөөцтэй ажиллаж байна.