Нүүрсний зах зээл хүнд байгаа хэдий ч “Эрдэнэс-Таван толгой” ХК үйл ажиллагаагаа хэвийн явуулж байгаагаа дуулгав. Тус компани энэ оны төлөвлөгөөний дагуу нүүрс олборлолтоо гүйцэтгэж, энэ оны зургадугаар сараас Цанхийн баруун уурхайд хөрс хуулалт, нүүрс олборлолтын ажлыг эхлүүлээд байна. Цанхийн зүүн уурхайг дөрвөн ээлжийн горимд шилжүүлж, Цанхийн баруун уурхайг эхлүүлсэнтэй холбоотойгоор оны эхнээс уурхай ажилчдын тоог 92-оор нэмэгдүүлжээ. Мөн цаашид олборлолт нэмэгдэхийн хэрээр хүчин чадлаа нэмэгдүүлэх төлөвлөгөөтэй байгаа юм. Харин удирдлагын болон бусад зардлыг хэмнэх талаар шат дараалсан арга хэмжээ авч хэрэгжүүлж байгаа. Компанийн. зохион байгуулалт, бүтцийг шинэчлэн батлуулж удирдах албан тушаалтны тоог цөөрүүлэн бүтцийг оновчтой болгохоор ажиллаж байна. Энэ ажлын хүрээнд дэд захирлын тоог нэгээр, компанийн төв оффисын ажилтнуудын тоог арван хувиар цөөрүүлсний үр дүнд цалингийн зардлыг найман хувиар бууруулах юм байна.