Эрхэм хүндэт профессор багш, оюутан залуус Та бүхэндээ Монгол Улсын ууган их сургуулийн 71 дэх хичээлийн шинэ жилийн баярын мэндийг хүргэе!

  Монгол Улсын их сургууль манай орны боловсрол, шинжлэх ухаан, технологийн хөгжлийг тэргүүлэн манлайлж, дэлхийн 200 гаруй их сургууль, эрдэм шинжилгээний байгууллагатай хамтран ажиллаж, улс эх орондоо 60 гаруй мянган дээд боловсролтой мэргэжилтнийг бэлтгэсэн, Монгол Улсын үндэсний ууган их сургууль билээ.

  Монгол Улсын их сургууль нь өнгөрсөн хугацаанд үндэсний дээд боловсролтой мэргэжилтэн бэлтгэхийн хамт дээд боловсрол, шинжлэх ухаан, технологийн олон салбарын эрдэм шинжилгээ, судалгааны ажлыг үндэсний хэмжээнд болон олон улсад хөгжүүлэн бэхжүүлж байна. Мөн нийгэм, эдийн засаг, улс төр, үндэсний мэдлэгийн тогтолцоог өөрчлөн шинэчилж, зөв чиглүүлэн хөгжүүлэхэд тус сургуулийн профессор багш, эрдэм шинжилгээний ажилтан, төгсөгчид, оюутан залуус чухал үүрэг гүйцэтгэж байна.

   Монгол Улсын их сургуулийн бодлого, стратеги, үйл ажиллагаа шинэчлэлийн төлөө Засгийн газрын дээд боловсролыг чанаржуулах, их сургуулиудыг судалгааны их сургуулийн тогтолцоонд шилжүүлэх зорилтыг хангахад бүрэн нийцэж байгааг онцлон тэмдэглэж байна.

  Монгол Улс байгалийн баялгаас илүүтэй монгол хүний эрдэм боловсрол, мэдлэгт тулгуурлан тогтвортой хөгжих нь ирээдүйн эрхэм зорилт гэж үзэж байна. Энэ зорилтыг хангахад Монгол Улсын их сургууль өнгөрсөн 70 жилийн хугацаанд олсон амжилтуудаа улам бататган, тэргүүлэх үүргийг гүйцэтгэж, боловсрол, шинжлэх ухааны байгууллагуудыг манлайлан ажиллана гэдэгт бүрэн итгэж байна.

  2013-2014 оны шинэ хичээлийн жилд эх орныхоо өнцөг булан бүрт ерөнхий боловсрол эзэмшсэн 3850 охид, хөвгүүд Монгол Улсын ууган их сургуульд элсэж оюутан болсон байна. Энэ бол Та бүхний хувьд аз завшаан төдийгүй нэр төрийн хэрэг мөн. Их сургуулийн амьдралд хөл тавьж буй залуус болон нийт оюутнууддаа Монгол Улсын эрдмийн уурхай болсон ууган их сургуулийнхаа нэр хүндийг өндөрт өргөн эрдэм мэдлэгт шамдан суралцаж, улс эх орондоо хэрэгтэй шилдэг мэргэжилтнүүд болохыг хүсэн ерөөе.

   Сургуулийн шинэ удирдлага төр, засгаас явуулж байгаа бодлогын хүрээнд эрдэмтэн профессор, багш ажилтан, оюутан залуучуудынхаа ажиллах, сурч боловсрох нөхцөл боломжийг хангах, ялангуяа багш ажиллагсадын хөдөлмөрийн үнэлэмжийг дээшлүүлэх, тэднийг 8 хувийн хөнгөлөлттэй зээлд хамруулах замаар орон сууцжуулах бодлогыг тууштай хэрэгжүүлэх хэрэгтэй гэдгийг онцлон тэмдэглэж байна. Багш, оюутнууд ч өөрсдөө санаачлагатай, идэвхитэй хамтран ажиллаарай.

  Монгол Улсын их сургуулийн эрдмийн хамт олон Та бүхэнд шинэ хичээлийн жилийн баярын мэндийг дахин дэвшүүлж, ажилд тань амжилт, амьдралд тань хамгийн сайн сайхан бүхнийг хүсэн ерөөе!

   Баярлалаа.