МУ-ын гавъяат тамирчин, олимпийн хүрэл медалт У.Мөнх-Эрдэнэ Монголын боксын холбооны удирдлагуудыг шударга бус үйлдэл хийж байна гэж мэдэгдлээ. Тодруулбал, У.Мөнх-Эрдэнэ ирэх 10-р сард Казахстаны Алмата хотод болох ДАШТ-д оролцохоор бэлтгэл сургууль хийж байгаа ч энэ тэмцээнд оролцох эсэх нь тодорхойгүй болжээ. Тэрбээр олимпийн наадмаас хойш Азийн аварга шалгаруулах тэмцээнээс мөнгөн медаль авч, бэлтгэл сургуулилтаа таслахгүй байгаа аж. Гэтэл түүнийг Алматад болох ДАШТ-нд оролцуулахын тулд өөр тамирчинтай сорилт хийх болсон нь шударга бус гэж тэрбээр үзэж байна.

  Учир нь хэрэв ийм хэмжээний том тэмцээнд оролцох хоёр ба түүнээс дээш тооны тамирчин байвал шинэ оны өмнө нэгдсэн журмаар, зохион байгуулалттайгаар сорилт авдаг аж. Харин тэмцээн болоход нэг сарын хугацаа дутуу байхад Монголын боксын холбоо сорилт авна гэж зүтгэжээ. Түүний өрсөлддөг 64 кг-ын жинд сорилт явуулах гэж буй тамирчин нь энэ жилийн Улсын аварга шалгаруулах тэмцээнд түрүүлсэн залуу тамирчин, өмнө нь олон улсын ямар нэгэн тэмцээнд түрүүлж байгаагүй гэлээ. У.Мөнх-Эрдэнэ "Хэрэв улсын аварга гээд ДАШТ-д явуулдаг бол би ч гэсэн арван удаагийн улсын аварга. Яг тэмцээний бэлтгэл хангагдаад явж байхад сорилт хийх гэж байгаа нь шударга бус" гэв. Энэ талаар Монголын боксын холбооноос тайлбар шаардсан ч одоогоор ямар нэгэн хариу өгөөгүй байгаа аж.