Эрүүл мэндийн яам энэ жилээс эхлэн жил бүрийн 9 дүгээр сарыг "Оюутны эрүүл мэндийг дэмжих сар" болгоод байгаа. Тэгвэл энэ аяныг зохион байгуулахаар ЭМЯ, ХАХНХЯ, НЭМГ, НҮБ-ын Хүн амын сан, МОХ зэрэг байгуулагуудын хамтарсан ажлын хэсэг байгуулагджээ. Тэд энэ нэг сарын хугацаанд хийх хэрэгжүүлэх ажлынхаа талаар өнөөдөр сэтгүүлчдэд мэдээлэл хийлээ.
"Оюутны эрүүл мэндийг дэмжих сар"-ын нээлтийг ирэх баасан гарагт буюу энэ сарын 6-ны өдөр Чингисийн талбайд зохион байгуулахаар болсон байна. Нээлтэд холбогдох яам агентлагууд эмнэлэгийн байгууллагууд оролцохоос гадна их дээд сургуулиуд оролцох юм. Энэ үеэр оюутнуудад эрүүл мэндээ хэрхэн хамгаалах талаар сургалт сурталчилгаа явуулж, эрүүл мэндийн даатгалд хамруулах, хараа шалгах, амны хөндийн үзлэг зөвлөгөөг өгөх, өндөр жин үзэх зэрэг олон үйл ажиллагаа зохиогдох аж.
Энэ жилийн хувьд оюутнуудад эрүүл мэндээ хамгаалах талаар сургалт сурталчилгаа явуулаад зогсохгүй оюутнуудыг эрүүл мэндийн болон нийгмийн даатгалд хамруулах ажлыг эрчимжүүлнэ хэмээн онцолсон юм. Оюутнууд эрүүл мэндийн даатгалд хамрагдсанаар жилдээ 1328000 төгрөгний эмнэлэгийн тусламж үйлчилгээг үнэ төлбөргүй авах эрхтэй байдаг юм байна. Мөн оюутнууд сайн дурын үүднээс нийгмийн даатгалд даатгуулах болдог аж.
Түүнчлэн хөдөө орон нутгаас хотод сурахаар ирсэн оюутнууд хаягын зөрчлөөс үүдэн улсын эмнэлэгүүдээр үйлчлүүлж чаддаггүй. Энэ байдлыг судалж үзэн НЭМГ-аас тэдгээр оюутнуудад түр оршин суугчдын бүртгэлд хамруулах ажлыг эхлүүлэхээр болжээ. Ингэснээр хөдөө орон нутгийн оюутнууд түр оршин суугчын бүртгэл иргэний үнэмлэх даатгалын дэвтэр зэрэг бичиг баримтаараа харъяа дүүргийн эмнэлэг болон улсын эмнэлэгүүдээр үнэ төлбөргүй үйлчлүүлэх боломжтой болох юм.
Мөн тус аяны хүрээнд энэ сарын 13-15-нд Увс аймгын Хяргас нуурын орчимд орон нутгийн оюутнуудын дунд урлаг, спортын наадмыг зохион байгуулах юм байна.
Дашрамд дуулгахад улсын хэмжээнд нийт 175 мянга гаруй оюутан байдгын 88 хувь нь УБ хотод сурдаг. Үүнээс 57 хувь нь хөдөө орон нутгийн харъяалалтай бөгөөд 17 мянга орчим нь дотуур байранд амьдардаг аж. Оюутнууд буюу 16-34 насныхан харьцангуй эрүүл бүлгийн хүмүүс боловч архаг эмгэгтэй хүмүүсийн 60 гаруй хувь нь уг эмгэгийг өсвөр залуу насандаа авсан байдаг. Эдгээр залуучуудын дунд хийсэн судалгаагаар 60-аад хувь нь ямар нэгэн өвчтэй байжээ. Түүнчлэн цэрэг татлагад 15 хувь нь дотор эрхтний, 10 гаруй хувь нь харааны бэрхшээлтэй хэмээн хасагддаг байна.