МУГТ, олимпийн хүрэл медальт У.Мөнх-Эрдэнэ Монголын боксын холбооны удирдлагуудыг хууль бус үйл ажиллагаа явуулж байна хэмээн үзэж байгаа аж. Энэ талаар түүнтэй ярилцлаа.

-    Ирэх аравдугаар сард боксын дэлхийн аварга шалгаруулах тэмцээн болно. Энэ тэмцээний 64 килограмыг төлөөлж Монголоос таныг оролцоно гэж хүмүүс бодож байгаа. Гэтэл өнөөдөр та явах үгүй нь эргэлзээтэй болсон байна. Энэ талаар дэлгэрэнгүй мэдээлэл өгнө үү?

-    Дэлхийн боксын аварга шалгаруулах тэмцээн ирэх аравдугаар сард Казакстан улсын Алмата хотод болно. Би энэ удаагийн дэлхийн аварга шалгаруулах тэмцээнд оролцож, аварга болно гэсэн зорилготойгоор бэлтгэл сургуулилтаа хийгээд явж байна. Энэ жил болсон Ази тивийн аварга шалгаруулах тэмцээнд амжилттай сайн оролцож, мөнгөн медаль хүртэж бэлтгэл сайн байгаагаа баталж харуулсан. Би чансаагаараа дэлхийд нэгдүгээрт бичигдэж байгаа. Олимпийн наадмаас хойшхи бэлтгэл сургуулилт сайн байгаа гэдгээ Азийн дэлхийн аварга шалгаруулах тэмцээнд амжилттай орж баталсан. Харин боксын холбооныхон яг яаж ДАШТ-нд тамирчдын явуулах гээд байгаа нь эргэлзээтэй будлиантай санагдаж байна. Тиймээс энэ асуудлыг зөвхөн боксын хүрээндээ хэдхэн хүн яриад байх биш бүх хэвлэл мэдээллээр дамжуулаад ард түмэндээ болоод байгаа үйл явдлыг танилцуулах гэсэн юм.

-    Боксын холбооноос гаргасан ямар шийдвэр таньд будлиантай санагдаад байгаа юм бэ?

-    Дэлхийн аварга шалгаруулах тэмцээнд оролцоно гэсэн итгэл надад их байсан. Би Азийн аварга шалгаруулах тэмцээнд оролцохдоо сорилт хийлгэж байж оролцсон. Гэтэл одоо намайг дахин сорилтод ор гэж байна. Тамирчныг яаж сорих ёстой юм бэ гэдгийг шигшээ багийн удирдлагууд, дасгалжуулагчид ойлгохгүй байх шиг байна. Сорилтод адилхан түвшинтэй хоёр хүнийг оруулах ёстой. Яг надтай адилхан дэлхийн аваргаас мөнгөн медаль, олимпиос хүрэл медаль, Азийн аварга шалгаруулах тэмцээнээс мөнгөн медаль авсан хүн надтай сорих ёстой. Түүнээс биш чансаагаараа хаана ч яваад байгаа нь мэдэгдэхгүй хүнтэй сорилт хийлгэх байгаад нь эсэргүүцэл үзүүлж байгаа юм. Яагаад намайг сорилтод оруулах гээд байгаа юм бэ гэж асуухад одоог хүртэл хариугаа өгөөгүй л байна.

-    Азийн аваргад оролцсон шиг энэ удаа ч сорилт өгч болохгүй гэж үү?

-    Он гарснаас хойш намайг улсын шигшээ баг, бусад багийн хамтарсан бэлтгэлд хамруулаагүй. Европ, Ази, Казакстаны хамтарсан бэлтгэлд бүгдэд нь хамруулаагүй. Харин миний оронд өөр хүн авч явдаг. Төсвөөс надад олгож байгаа мөнгөөр миний оронд өөр хүнийг авч явж байгаа.  Хэрвээ тамирчин хооронд сорилт явуулах гэж байгаа бол оны өмнө явуулах ёстой. Хамтарсан бэлтгэлд оруулаад хооронд уралдуулж, бэлтгэл сургуулилтыг харьцуулж байж сорилтод оруулдаг. Тэгээгүй байж сорилт хийнэ гээд байхад үнэхээр гайхаж байна. Яагаад рейтингээрээ дэлхийд нэгдүгээрт бичигддэг тамирчнаа оролцуулахгүй гээд улайраад байгааг гайхаж байна. Гадны тамирчинд медалиа өгөх гэж ярилцсан явуулга биш байгаа гэж манай багш хардаж байгаа. Надтай нэгэн үед амжилт гаргаж байсан бүх тамирчид зодог тайлаад явж байна. Харин би одоог хүртэл энэ 64 кг-нд жингээ бариад явж байна. Олон улсын тэмцээн гэдэг бол олон орны тамирчдыг ур чадвараар нь өрсөлдүүлж, тэр хэрээр тухайн улс орны нэр хүндийг өргөдөг тэмцээн шүү дээ.

-    Боксын холбооны зүгээс яг хэдэнд сорилт хийнэ гэсэн юм бэ?

-    Ирэх баасан гаригт хийнэ гэсэн. Өөрсдөө намайг хамтарсан бэлтгэлд орхиод явсан. Харин надтай өрсөлдүүлэх гээд байгаа хүүхдээ хамтарсан бэлтгэлд авч явсан.  Сорилтыг хэрвээ жинхэнэ тамирчид дунд хийх гэж байгаа бол дэлхийн аваргад орсон бүх тамирчид дунд хийх ёстой. Олон улсын тэмцээнд бол нэг жинд 2-3 хүн авч явдаг. Тэгээд одоо дэлхийн аваргад явах бүх тамирчид дунд сорилт хийх ёстой байтал ганцхан надад сорилт хийнэ гээд байгаа юм.

-    Сорилт хийнэ гэдгийг хэд хоногийн өмнө мэдсэн бэ?

-    Манай дасгалжуулагч сорилт хийлгэхгүйгээр намайг ДАШТ-нд оролцуулна гэсэн саналыг тавьсан юм. Гэтэл хариу өгөхгүй байж байгаад өмнөх сарын 12-нд сорилт хийлгэж байж явуулна гэж хэлсэн. Оны өмнө сунгаагаар сорилт хийж тамирчнаа сонгох ёстой байтал одоо сорилт хийнэ гэж байгаад л гайхаж байна. Тэмцээний өмнө сорилт хийх нь тамирчин хүн сэтгэл санаа, бие махбодийн хувьд хүнд цохилт болдог учраас бид сорилт хийхээс татгалзаад байгаа юм. Тамирчид бид маш эмзэг байдаг.

-    Боксын холбооны зүгээс энэ жил улсын аварга болсон залуу тамирчин Энхзоригийг ДАШТ-нд оролцуулах гээд байгаа юм биш үү. Тухайн жил УАШТ-нд түрүүлсэн хүүхдээ ДАШТ-нд явуулах ёстой гэж тайлбарлаж байгаа. Энэ үед нь та барьцаад шинэ хүүхэддээ боломж өгөхгүй байгаа юм биш үү?

-   Хэрвээ Энхзориг 55 кг, 60 кг-д байхдаа дэлхийн рейтингт орчихсон, олимп дэлхийн аваргаас медалиа авчихаад 64 кг-д орно гэж байгаа болно гэхсэн. Би он гараад олон улсын хамтарсан бэлтгэл болон тэмцээнд оролцоогүй байж байгаад Азийн аварга шалгаруулах тэмцээнд оролцсон. Ази тивийн аварга шалгаруулах тэмцээнд энэ тивийн бүх шигшээ тамирчид очсон. Энэ тэмцээнд би Ази тивийн аварга, дэлхийд дээгүүрт бичигддэг тамирчидтай өрсөлдөөд мөнгөн медаль авлаа. Олон улсын тэмцээнд бэлтгэлээ хангаж, мэдрэмж авч байж оролцоно. Түүний тулд тамирчдаа бэлтгэж, явуулдаг. Би түүнд хамрагдахгүй өөрөө хувиараа бэлтгэл хийж байгаа 21 хоног Азийн аваргад орох багтайгаа цуг бэлтгэлд гарсан. Оюутны олон улсын наадамд бол Оросын холбооны улс бүх төрлөөр шигшээ багаа оруулсан. Орос, Монголоос боксын шигшээ багаа оролцуулсан. Бусад бүх улс орон нь шударгаар оюутнуудаа оролцуулсан. Түүнээс ганц хоёр оюутан мөртлөө сайн тамирчин байсан. Тэгээд оюутны тэмцээнээс медаль аваагүй хүнтэй намайг сорилт хийлгэх гэж ярьж байна. Би гадны нэр хүндтэй тэмцээнд очоод бэлтгэл сайн байгаагаа харуулж л байгаа шүү дээ. Эхний сорилт хий гэхэд нь би хийсэн. Адаглаад оюутнуудын тэмцээнд очоод медаль аваад ирсэн тамирчинтай намайг сорилт хий гэж байгаа бол одоо хийхсэн. Тийм зүйл байхгүй шүү дээ. Үнэхээр харах гээд байгаа долоо хоногийн гурван өдөр нь ордог зодооны бэлтгэл дээр бид хоёрыг өрсөлдүүлж болох байсан. Улсын аварга болсон гээд л дайраад байдаг бол би Монгол улсын аварга цолыг 10 удаа авсан. Урьд аварга болоогүй тамирчиныг багш нар нь сонгож байгаад олон улсын тэмцээнд явуулдаг байсан. Гэхдээ үнэн зөв шийдвэр гарах байх.