Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Цэргийн дүйцүүлэх албан хаагчдын сургалт зохион байгуулах тухай” захирамж гаргасан. Захирамжийн дагуу цэргийн дүйцүүлэх алба хаагчдын гүйцэтгэх үүргийн мэдлэг, дадлагыг гүнзгийрүүлэх сургалтыг энэ сарын 30-аас ирэх сарын 11-ний өдрүүдэд гурван хэсэгт хуваарилан зохион байгуулах юм байна. Нэгдүгээр хэсэгт Баянгол, Сонгинохайрхан, Чингэлтэй дүүргүүд, Хоёрдугаар хэсэгт Баянзүрх, Сүхбаатар, Хан-Уул дүүргүүд, Гуравдугаар хэсэгт Налайх, Багануур, Багахангай дүүргүүд хамрагдах юм.  Сургалтын нэгдүгээр хэсгийг БГД-ийн ЗДТГ-ын  Цэргийн штабын дарга, хурандаа Л.Ганбаатар, хоёрдугаар хэсгийг БЗД-ийн ЗДТГ-ын Цэргийн штабын дарга, хурандаа Ч.Цог, гуравдугаар хэсгийг НД-ийн ЗДТГ-ын  Цэргийн штабын дарга, хурандаа Д.Байгал нар ахлан ажиллах аж.