“Оюутолгой” компанийн ТУЗ-д Монголын талыг төлөөлж байгаа Ч.Ганболд, П.Цагаан нар ТУЗ-ийн гишүүнээс огцрох өргөдлөө өгөөд байсан. Тэгвэл үлдсэн нэг гишүүн болох Н.Багабанди удахгүй өргөдлөө өгөх бололтой. Тэдний оронд томилогдох гурван хүний нэрийг Монголын тал ийн гаргасан байна.

Эхнийх нь “Эрдэнэс Оюутолгой” компанийн захирлаар томилогдоод удаагүй байгаа Д.Ганболд бөгөөд “Оюутолгой” компанийн хувь нийлүүлэгч компанийн захирал ТУЗ-д байх ёстой гэдгийг нэлээд эртнээс ярьж эхэлсэн нь биелэлээ олох нээ.

Хоёр дахь нь Германд их сургууль төгссөн, Ерөнхийлөгчийн Эдийн засгийн бодлогын зөвлөх, Өрсөлдөх чадварын судалгааны төвийн захирлаар ажиллаж байгаад Уул уурхайн яамны Стратеги бодлого төлөвлөлтийн газрын даргаар томилогдоод жил орчим болж байгаа Ч.Отгочулуу юм.

Удаах нь  "Оюутолгой" төслийн үйл явц, Хөрөнгө оруулалтын гэрээг хамгийн сайн мэддэг гэх Г.Тэмүүлэн гэнэ. Тэрбээр Хөрөнгө оруулалтын гэрээг байгуулах хэлэлцээрт эхнээс нь оролцож байсан. Америкийн Их сургуульд мастер хамгаалсан, “Эрдэнэс МГЛ” компанийн Дэд захирлаар тогтвортой ажиллаж байгаа юм. Түүнийг “Оюутолгой” төсөлд Монголын талын байр суурийг хамгаалж байгаа гол хүн учир ийнхүү ТУЗ-д томилж байгаа бололтой.