“Discover Mongolia 2013” олон улсын чуулга уулзалт өчигдөр Монголын хүүхдийн ордонд эхэлж, өнөөдөр өндөрлөх гэж байна. Тус чуулганыг Монголын уул уурхайн үндэсний ассоциациас зохион байгуулж байгаа юм.

Монголын эрдэс баялгийн салбарыг дэлхий нийтэд сурталчлах, хөрөнгө оруулагчдыг татах зорилгоор Монголын уул уурхайн үндэсний ассоциаци, “Прайм инфо” компанитай хамтран дээрх чуулга уулзалтыг 11 дэх жилдээ зохион байгуулж буй юм. Чуулга уулзалтад одоогоор гадны 20 гаруй орны төлөөлөгчид оролцож байна. Өмнө нь тодорхой сэдвийн хүрээнд хэлэлцүүлэг өрнүүлдэг байсан бол энэ жил сонгон авсан таван сэдвийн хүрээнд ярилцаж байна. Тухайлбал “Хууль, эрх зүйн тогтвортой орчныг бий болгох нь”, “Дэд бүтцийг хөгжүүлэх оновчтой шийдэл”, “Байгаль орчны асуудлууд”, “Хүний нөөцийн эрэлт, нийлүүлэлт”, “Орон нутгийн засаг захиргаа, олон нийтийн оролцоо” сэдвээр хэлэлцүүлэг өрнүүлж байна. Түүнчлэн сүүлийн үед олон нийтийн анхаарлыг татаад буй шатдаг занарын асуудлаар салбар хуралдаан болох бөгөөд эрдэс баялгийн нөөц, хайгуул, ашиглалтын өнөөгийн байдал, төрөөс баримталж буй бодлогын талаар холбогдох албан тушаалтнууд мэдээлэл өгөх аж.

“Discover Mongolia 2013” уул уурхайн салбарт хөрөнгө оруулагчдын олон улсын чуулга уулзалтын ерөнхий ивээн тэтгэгчээр “Оюутолгой”, “Англо-Американ Монголиа” ажиллаж байна. Уул уурхайн яам болон Ашигт малтмалын газраас чуулга уулзалтыг зохион байгуулахад дэмжин ажиллаж байгаа аж.