Дорноговь аймгийн Улаанбадрах суманд ураны хайгуул хийдэг Францын “Aрева” группийн охин компани болох "Кожегоби"-ийн үйл ажиллагааг түр хугацаагаар зогсоогоод байсан ч тус компани дахин олборлолтоо хийхээр болсон.

Уг нь Улаанбадрах сумын малчид, Гал үндэстэн холбооныхон нийлж цөмийн эсрэг тэмцлийг өрнүүлж,  дөрвөн машин, 10 мотоцикль болон тэмээгээ унаж очин тус компанийн өрөмдлөг хийж буй цэгийг бүслэн хаасан юм. Тиймээс "Кожегоби" компанийхан өрөмдлөгөө түр зогсоож өрөмдлөгийн техникээ буулгаж, кемпээ татаад байсан билээ.

"Кожегоби" компанийн зүгээс малчидтай тохиролцож үйл ажиллагаагаа үргэлжлүүлэн явуулна гэж байсан ч малчид нутагтаа ураны хайгуул хийлгэхгүй гэж зүтгэсээр байгаа юм.

Харин өнгөрсөн долдугаар сарын 30-нд “Арева” компанийн удирдлагууд нутгийн иргэдтэй уулзаж, ажилд саад болох юм бол Монгол Улсын Засгийн газрыг олон улсын шүүхэд өгнө хэмээн мэдэгдсэн. Үүний дагуу “Арева” компанийнхан өнгөрсөн долоо хоногийн дундуур Засгийн газрын төлөөлөлтэй уулзаж, үйл ажиллагаагаа үргэлжлүүлэн явуулах зөвшөөрлөө авсан байна. Тус компани Дорноговь аймгийн Зүүнбаян багийн нутагт хийж буй хайгуулын ажлаа үргэлжлүүлж, хоёр өрмөөр өрөмдөхөөр болжээ.  Өнгөрсөн өвөл Засгийн газраас  хэд хэдэн удаа энэ газарт шалгалт хийсэн ч ураны хайгуулаас болж мал үхээгүй гэдэг нь нотлогдсон юм. Гэсэн ч нутгийн иргэд гажигтай төл гарч, мал олноороо үхэх болсныг Кожегоби компанийн буруутай үйл ажиллагаанаас болсон хэмээн тайлбарлаж байгаа. Нутгийн иргэд болон Засгийн газар, Кожегоби компанийн хоорондох зөрчил одоог хүртэл үргэлжилсээр байна. Харин Дорноговь аймгийн Засаг дарга Кожегоби компанийн буруутайг хууль хяналтынхан тогтоовол үйл ажиллагааг нь зогсооход бэлэн гэдгээ хэлж байна.