Өнөөдөр манай улсын түүхэн дэх нэгэн хар толбо болсон улс төрийн хилс хэрэгт хэлмэгдэгсдэд хүндэтгэл үзүүлэх өдөр юм. Энэ өдрийн хүрээнд  9.00 цагаас Сонгинохайрхан ууланд байрлах Хэлмэгдэгсдийн булшинд, 13.00 цагаас Улс төрийн хилс хэрэгт хэлмэгдэгсдийн дурсгалын төв хөшөөнд тус тус цэцэг өргөх юм.

Түүнчлэн өнөөдөр "Улс төрийн хэрэгт хэлмэгдэгсдийн музей" иргэдэд үнэ төлбөргүй үйлчлэх бөгөөд  хэлмэгдэгсэд, тэдний эхнэр /нөхөр/, үр хүүхэд, ач, зээ нарын төлөөлөлтэй уулзалт хийхээр төлөвлөжээ.

Монгол улсын түүхэнд хар толбо үлдээсэн аймшигт үйл явдал бол 1920-1960 оныг хамрах улс төрийн хэлмэгдүүлэлтийн үе юм. Энэ үед Монголчууд 60 мянга гаруй нэрт сэхээтэн, эрдэмтэн, энгийн олон иргэдээ алдсан билээ. Харин Монгол улсын Засгийн газраас тухайн үед хэлмэгдсэн иргэдийнхээ нэрийг цагаатгах ажлыг гурван үе шаттайгаар одоог хүртэл зохион байгуулж ирсэн юм. 1996 оноос эхлэн 9 дүгээр сарын 10-ны өдрийг улс төрийн хилс хэрэгт хэлмэгдэгсдийн өдөр болгосоор энэ жил 18 дахь жилийн нүүрийг үзэж байна. Энэ өдөр хэлмэгдэгсдийн хөшөөнд төрийн тэргүүн албаны хүмүүс цэцэг өргөн хүндэтгэл үзүүлж, хэлмэгсдийн музей уламжлал ёсоор хэлмэгдсэн иргэдийнхээ үр хүүхэд, ач, жич, гуч нарыг хүлээн авдаг уламжлалтай.