-Юуны өмнө та манай уншигчдад өөрийгөө танилцуулаач?
-Намайг Т.Баасандорж гэдэг. Би “Харилцааны хөгжил” ТББ-ыг 2006 онд байгуулсан. Тэр цагаас хойш Улаан чулуутын хогийн цэг дээр хог түүж амьдардаг хүүхдүүдэд туслахаар янз бүрийн сургалт явуулж ирсэн. Бид харилцааны талаар болон англи хэлний сургалтууд явуулдаг. Энэ бүхнийг санаа нийлсэн найз нөхөдтэйгээ хамтран хийдэг. Бид зургаан жил ажиллахдаа маш олон хүнийг хогноос холдуулсан. Тухайлбал 18 айлыг гэртэй болгож аав ээжийг нь ажилтай хүүхдүүдийг нь сургуультай болгосон байдаг.

-Танай ТББ цэцэрлэг байгуулж тусгай зөвшөөрлөө гардан авлаа. Энэ талаараа манай уншигчдад ярьж өгөхгүй юу?
-Манай англи хэлний багш Жүли гээд канад эмэгтэй байдаг.  Энэ багштайгаа хамтраад бид Улаан чулуутын хогийн цэгийн наана 40 хүүхэд хүлээн авах хүчин чадалтай "Нарны өргөө" гэх цэцэрлэгийг байгуулж байна. Энэ цэцэрлэг хувийн цэцэрлэг ч гэлээ үнэ төлбөргүй. Бид эцэг эх нь хог түүдэг хүндхэн амьдралтай айлын цэцэрлэгийн насны хүүхдүүдийг цэцэрлэгтээ сурган хүмүүжүүлэх юм.

-Энэ цэцэрлэгийнхээ тухай дэлгэрэнгүй яриач? Улсын цэцэрлэгүүдтэй адилхан сургалттай юу?
-Бид улсын цэцэрлэг шиг өглөөний 09-өөс орой 17 цаг хүртэл ээж аав нь хог түүгээд эзгүй байх үеэр хүүхдүүдийг нь асрана. Мэдээж энд өвөө эмээ дээрээ өссөн ч юм уу эцэг, эх нь байхгүй хагас болон бүтэн өнчин хүүхдүүд байдаг. Бас аав, ээж нь байдаг ч маш их архи уудаг учраас анхаарал халамж дутсан хүүхдүүд байна.  Бид тэр хүүхдүүдийг ирээдүйдээ итгэлтэй болоход нь туслахыг зорьж ажилладаг.

-Та дээр хэлэхдээ олон хүүхдийг хогноос холдуулсан гэсэн. Бидэнд нэг жишээ хэлбэл?
-Аалз гээд нэг хүү байсан юм. Биендээ олон шивээстэй болохоор түүнд ийм хоч өгсөн юм билээ. Тэр биднийг тусалж байхад 10 гаруй настай, маш хэцүү амьдралтай хүү байсан. Түүний гэр бүл тэр өөрөө ч гэсэн хог түүж амьдардаг байв. Түүнд амьдрах хүсэл байхгүй, их танхай хүү байсан л даа. Тэр байнга шахуу зодоон цохион хийдэг, хэнээс ч, юунаас ч айдаггүй хүүхэд байсан. Энэ хүүхдийг бид Дархан хотод байдаг “Ваяам” гээд сургуульд явуулсан. Аалз тэнд жил гаруй сураад ирэхдээ танигдахын аргагүй өөрчлөгдсөн. Ээж нь бүр “Миний хүү ийм сайхан хүн болно гэж би төсөөлж ч байсангүй” гээд уйлж байсан. Тэр ээждээ өдөр бүр “хайртай шүү” гэж хэлээд ямар нэгэн аргаар баярлуулдаг болсон. Түүнийг хараад тэнд амьдардаг хүн бүхэн гайхаж байсан.

-"Харилцааны хөгжил" ТББ санхүүжилтээ хаанаас олдог вэ? Энэ цэцэрлэгийг байгуулахад хэн туслав?
-Би ОУ-ын байгууллагад ажиллахаас гадна сургуульд сурдаг. Өөрөөсөө болон найз нөхдөөсөө санхүүжилтийг нь гаргаад тэр хүүхдүүдийг сургалт явуулж хооллодог байсан. Монголчууд бид бие биедээ туслахыг өөрсдөөсөө эхлэх хэрэгтэй юм шиг санагддаг. Энэ маягаар зургаан жил ажиллахдаа маш олон найз нөхөд танилуудтай болсон байгаа. Хагас сайн өдөр бүр бид 100 гаруй хүүхдийг цуглуулж сургалт явуулдаг. Анхандаа хоёр гуравхан хүүхэдтэй байсан. Одоо жижиг сургалтын төв шиг нэг том гэрт үйл ажиллагаа явуулж байна. Тэдгээр хүүхдүүдэд бид том байшин машин өгч чадахгүй ч гэсэн сайхан амьдрах итгэлийг өгөхийг хүсдэг. Цэцэрлэг байгуулах асуудалд мөнгө мэдээж их хэрэг болсон. Үүнд манай Жүли гээд англи хэлний багш болон найз нөхөд маань тусалж цэцэрлэгийнхээ байшинг барьж босгосон байгаа.

-Шинээр байгуулагдсан цэцэрлэг хэдэн багш ажилтантай вэ?
-Ерөнхийдөө хоёр багш, нэг менежер, манаач  зэрэг хүмүүс байгаа. Энэ хүмүүс маань сайн дураараа ажиллаж байгаа ч гэсэн зохих хэмжээний цалин олгодог. Цалингийн эх үүсвэрийг Жүли багш олж өгдөг.

-Та түрүүнээс хойш Жүли хэмээх багшийн тухай их ярилаа. Тэр хүний тухай ярьж өгөөч?
-Жүли багш маань Канад улсын иргэн. Настайвтар эмэгтэй байгаа. Тэр сайн дураараа хүмүүст тусалж англи хэл заадаг. Дэлхийн өнцөг булан бүрт зовж шаналж байгаа бяцхан хүүхдүүдэд тусалж тэднийг сайхан амьдрахад нь туслах хүсэлтэй. Нөхөр нь “Оюутолгой”-д ажилладаг. Ийм л хүн байгаа юм.