Сангийн дэд сайд асан Ч.Ганхуяг болон эмч Б.Болдсайхан нар Засгийн газрын ордон руу салаавч гаргаж, эсэргүүцлээ илэрхийлсэн. Б.Болдсайхан эмчийг цагдаагийн газраас дуудаж байцаалт авсан, эрүүгийн хэрэг үүсгэж магадгүй гэх мэдээлэл хэвлэлээр цацагдаад байсан. Энэ талаар ЦЕГ-ын хэвлэл мэдээллийн ажилтан Ё.Лхагвасүрэнгээс тодрууллаа.

-Салаавч гаргасан гэх таван хүнд эрүүгийн хэрэг үүсгэсэн гэх мэдээлэл гараад байна. Үнэн үү?
-Б.Болдсайхан нарыг салаавч гаргаж, танхайрсан гэдгээр биш зөвшөөрөлгүй жагсаал зохион байгуулах гэж оролдсон гэх үндэслэлээр цагдаагийн газраас дуудаж сануулга өгсөн. Өөрөөр хэлбэл Сүхбаатар дүүргийн цагдаагийн нэгдүгээр хэлтсээс өөрийнх нь нутаг дэвсгэрт гарсан эл асуудлын талаарх мэдээллийн дагуу энэ хүмүүсийг дуудаад, ямар учраас жагсаал цуглаан зохион байгуулах болсныг нь асууж тодруулсан байгаа.

-Яг ямар сануулга өгсөн юм бол?
 -Дараагийн удаа жагсаал хийхдээ зохих байгууллагаас зөвшөөрөл авах, дахин тийм үйлдэл гаргахгүй байхыг сануулаад явуулсан.  Өөрөөр хэлбэл, Хэрвээ жагсаал, цуглаан хийх гэж байсан бол жагсаал цуглааны тухай хуулийн 9/1-т заасны дагуу бүртгүүлэх шаардлагатай. Ингэж бүртгүүлвэл цагдаагийн байгууллага тухайн жагсаал цуглаан зохион байгуулж байгаа хүмүүсийн аюулгүй байдлыг хангах үүрэгтэй. Тэгэхээр энэ хүмүүс бүртгэлгүйгээр жагсаал, цуглаан хийхийг завдсан учир Сүхбаатар дүүргийн цагдаагийн хэлтсээс дуудаж 9/1-ийг сануулсан байгаа.

-Хэчнээн хүнийг дуудаж сануулга өгсөн бэ?
-Б.Болдсайхан, Ч.Ганхуяг, Р.Энхсайхан, Өнөрбаяр гэх таван хүнд сануулга өгсөн. Тэдгээрээс  нэг нь л тайлбар хэлсэн.

-Үлдсэн хүмүүс нь ямар ч тайлбар өгөөгүй юм уу?
-Эдгээрээс Ч.Ганхуяг гадаадад ажилтай явж байсан учир утсаар ярьж мэдэгсэ. Харин Р.Энхсайхан нь тайлбар өгсөн. Тэгвэл Б.Болдсайхан нь тайлбар өгөхийг татгалзсан.

-Дахин жагсаал, цуглаан зөвшөөрөлгүй зохион байгуулвал ямар арга хэмжээ авах уу?
-Хуулийн дагуу арга хэмжээ авна. Үүнд торгуулын арга хэмжээ ч багтана. Бүртгэлгүй жагсаал, цуглаан зохион байгуулсан, эсвэл жагсаал цуглааны явцад түүний зорилгыг өөрчилж энэ хуулийн 8/1-т заасан хориглосон тушаалыг зөрчсөн улс төрийн нам, төрийн бус байгууллагыг 100-250 мянгаар торгож шийтгэнэ гэж заасан байдаг. Мөн 15/2-т зааснаар хууль бус жагсаал, цуглааныг зохион байгуулсан гэм буруутай зохион байгуулагчид эрүүгийн хариуцлага хүлээлгэж 20-50 мянган төгрөгөөр торгох эсвэл 20-30 хоногийн хугацаатай баривчлах шийтгэл ноогдуулах юм.