ХЭҮК-т ирсэн нийт гомдлын 70-80 хувийг ял шийтгүүлээд хоригдож байгаа болон цагдан хоригдож байгаа хүмүүсээс ирүүлсэн байдаг. Мөн хэрэг нь шалгагдаж дуусаад шүүхээр шийдвэрлүүлж байгаа хүмүүсийн өргөдөл гомдол ч байдаг гэж байгаа. Тэгвэл үүнийг баталж ХЭҮК-ийн дарга Ж.Бямбадорж цагдаа хүчний байгууллага эрүүдэн шүүх ажиллагааг явуулж байна гэсэн ширүүхэн мессежийг иргэдэд хүргэсэн. “Хүмүүсийг айлгадаг, сүрдүүлдэг, үг зааж өгдөг, гарын үсэг хүчээр зуруулдаг хэргүүд ихээр гарах болсон. Хууль хяналтын байгууллага нь юун түрүүнд хүний эрүүдэн шүүдэггүй ч ямар нэгэн байдлаар хүчээр хэргийг нь тулгах явдал байдаг“ гэх мэтээр тэрээр хэлэх гэснээ шулуухан хэлчихэв. Харин түүний хэлсэнтэй цагдаагийн байгууллагынхан төдий л санал нийлэхгүй байгаа юм. Учир нь түүнийг ийн мэдээлэл хийсний дараа ЦЕГ-аас нотлох баримт хүссэн.  Харин ХЭҮК-ийн дарга Ж.Бямбадорж одоо болтол хариу өгөөгүй байгаа аж.

Ер нь Хүний эрхийн үндэсний комисс /ХЭҮК/, хуулийнханы зөрчил хоёр нэлээн эртнээс эхэлсэн гэхэд болно. Саяхан бас эрүүдэн  шүүх сандлаас болж энэ хоёр байгууллагын дунд томоохон зөрчил бий болсон. Учир нь орон нутгийн цагдаа хүчний байгууллагуудад 400 ширхэг эрүүдэн  шүүх сандал тараасан байсныг ХЭҮК-ийн гишүүн П.Оюунчимэг орон нутагт шалгалтаар явж байгаад илрүүлсэн.  Үүний улмаас ихээхэн шуугиан дэгдэж, Хууль зүйн яамныхан ч нэлээн банга хүртэж өнөөх сандлуудыг эргүүлэн татах болсон.

Гэтэл энэ бүхэн намжаагүй байхад Ж.Бямбадорж дарга цагдаа нарын хууль бус үйлдлийг ярьж орхив. Гэхдээ ард иргэд яг хэн нь үнэн яриад байгааг мэдэхгүй төөрөлдөж байна. Ж.Бямбадорж даргын хэлж буйгаар иргэдийн ирүүлсэн өргөдөлд “намайг бичиг үсэг мэдэхгүйг далимдуулж бичиг цаасан дээр гарын үсэг зуруулдаг”, “чамайг шоронд хатаана”, “Эхнэртэй чинь шоронд хийнэ”, “хэргээ хүлээхгүй бол чамайг цонхоор шидчихээд өөрөө үсэрсэн гэж хэлнэ”, “өвчтэй ээжийг чинь шоронд хийнэ шүү” гэх зэргээр дарамталдаг гэсэн зүйл түлхүү байдаг гэнэ.  Тэрээр мөн “Манайхны олон арван жил хэрэгжүүлсэн хэлбэр бол өөрөөр нь хэрэг хүлээлгэж, нотлохыг оролддог. Эсвэл ах дүү төрөл төрөгсдөөс нь мэдүүлэг авдаг. Энэ бол Монгол Улсын Үндсэн хуулийг зөрчсөн явдал юм. Уг нь гэм буруутны ял зэмлэлийг түүний гэр бүлийн гишүүд, төрөл саданд нь халдаан хэрэглэхийг хориглоно гэж хуулиндаа заасан байдаг” гэсэн юм.

Харин ЦЕГ-ын байр суурийг хүргэхэд, тэд түүнийг үгийг үгүйсгээгүй ч нотлох баримтаа хангалттай авчираад, үнэн мөнийг илчлэхийг хүссэн. ЦЕГ-ын хэвлэл мэдээллийн албаны хэлтсийн дарга, цагдаагийн хурандаа Т.Сайнжаргал хэлэхдээ “Цагдаагийн ерөнхий газарт мөрдөн байцаалтын явцад хүний эрхийг зөрчиж, хүчээр хэрэг хүлээлгэсэн, айлган сүрдүүлсэн тухай гомдол нэг ч ирээгүй. Тиймээс Хүний эрхийн үндэсний комиссын даргыг ярьсан зүйлийнхээ талаар нотлох баримт байвал авчирч өгөхийг хүсч байна. Үнэхээр энэ асуудал үнэн бол Прокурорын газрын дэргэдэх мөрдөн байцаах газраар шийдвэрлүүлнэ” гэв.