Хөдөлмөрчдийн цалин тэтгэвэр, тэтгэмжийг нэмэх асуудлаар Үйлдвэрчний эвлэл, Засгийн газар хооронд хэлэлцээр хийсэн билээ. Харин одоо болтол иргэдийн цалин хөлсний хэмжээ өсөөгүй байгаа юм. Тиймээс МҮЭ-ийн холбооноос цалин тэтгэвэр, тэтгэмжийг нэмэгдүүлэхийг шаардаж, жагсаал цуглаан зохион байгуулахаар болсон байна. Эсэргүүцлийн тайван жагсаал энэ сарын 13-ны өдөр буюу маргааш 12.00 цагт Ялалтын талбайд болох юм байна.

Мөн МҮЭ-ний холбооноос Засгийн газар, Улсын Их Хуралд хандан шаардлага хүргүүлж, энэ сарын 20-ны дотор хариу ирүүлэхийг шаардсан байна. Ингэхдээ тэд төрийн албан хаагч болоод хувийн хэвшилд ажиллагчдын цалин хөлсийг даруй 40 хувиар нэмэх шаардлагатай хэмээн үзэж байгаа аж. МҮЭХ-ны Ерөнхийлөгч Х.Амгаланбаатарын хэлж буйгаар хөдөлмөрчдийн цалинг 40 хувиар нэмэх боломжтой байгаа гэнэ. Төсөвт ч ийм боломж байгаа гэж тэрээр ярьж байна.

Тэд цалин нэмэх шаардлагатай гэдэг үндэслэлийг тайлбарлахдаа "МҮЭ-ийн холбооноос сүүлийн нэг сарын хугацаанд хөдөө орон нутаг болон нийслэлийн иргэд хөдөлмөрчдөөс санал аваад байна. Валютын ханшны өсөлтөөс үүдсэн өргөн хэрэглээний барааны үнийн өсөлт нь нийт иргэдийн орлого амьжиргааны түвшинг хангахгүй болсон бодит хүндрэл бий боллоо. Иймд МҮЭХ-ноос иргэд, хөдөлмөрчдийн хөдөлмөр, нийгмийн хамгааллын тулгамдсан асуудлыг УИХ, Засгийн газарт хүргэх МҮЭ-ийн тайван цуглааныг зохион байгуулах гэж байгаа нь энэ юм. Мөн өргөн хэрэглээний бараа бүтээгдэхүүний үнэ өссөн учраас иргэдийн цалинг нэмэх шаардлагатай. МҮЭХ-оос Хөдөлмөр, нийгмийн зөвшлийн гурван талт хэлэлцээрт ч энэ талаар тусгасан байгаа. Тиймээс хэлэлцээрийн дагуу Засгийн газар, УИХ-аас иргэдийн цалинг нэмэх асуудлыг даруй авч хэлэлцэх хэрэгтэй байна. Мэдээж цалин нэмэхээр барааны үнэ өсдөг буруу хандлагатай. Тиймээс бид энэ тал дээр ч арга хэмжээ авч ажиллана" гэлээ.