Орчин үед нийгмийн бүхий л салбарт цахим үйлчилгээг нэвтрүүлж, техник технологийн хурдыг гайхуулах болж. Банк, эмнэлэгийн салбараас эхлээд захын хорооллын супермаркетад хүртэл цахим үйлчилгээг ашиглаж сайшаалтай. Харин эдгээрээс хамгийн их хэл ам, гомдол санал дагуулдаг нь дагуулдаг нь эмнэлэгийн салбар болоод байна. Сүүлийн үед иргэд эмнэлэгийн цахим үйлчилгээнд ихээхэн шүүмжлэлтэй ханддаг болжээ.

Тиймээс бид иргэдийн санал гомдлын дагуу эмнэлэгийн салбарын цахим үйлчилгээний талаар хөндлөө. Цахим үйлчилгээ нь тус салбарт нэвтрээд нилээдгүй олон жил болж байгаа ч хараахан үр дүнгээ бүрэн төгс өгч, иргэдийн ачааллыг хөнгөлж байгаа зүйл алга гэж эмчлүүлэгч нар ярьж байна. Тодруулбал эмнэлэгт нэг өдөрт янз бүрийн өвчтэй олон хүн ирдэг. Ялангуяа өвчний оношоо тодруулахаар ирсэн хүмүүст энэхүү үйлчилгээ нь хамгийн хэцүү асуудал болдог байна. Баянзүрх дүүргийн нэгдсэн эмнэлэг гэхэд  өглөөнөөс авахуулаад өдөр хүртэл үзлэгийн цаг авах гэсэн хүмүүсээр дүүрэн байх аж. Цахим үйлчилгээ үзүүлдэг гурван цонхтой боловч эмчилгээ, үйлчилгээ авах гэж ирсэн хүмүүсийн дараалал нь өглөөгүүр бол гадаах хаалганд тулсан харагдана. Иргэд эрүүл мэндийн дэвтэр, өвчний түүхийн карт энэ тэрээ бариад бүгд л эмнэлэгийн ажилтан руу сарвалзана.

Хариуд нь “өнөөдөр үзүүлэх боломжгүй” дараа долоо хоногийн даваа, мягмар гаригуудын цаг л байна гэсэн зүйлийг сонсоно.

 Шүдэнд үзүүлэхэд цаг авъя гэхэд "байхгүй, байхгүй" гэсэн хариулт л сонсоно. Эмэгтэйчүүдийн эход цаг авъя гэхэд дараа долоо хоног, эсвэл бүр тэрний дараагийн долоо хоногийн л цаг өгөх жишээтэй. Нэг эмчид үзүүлэх цагийг долоо хоногийн өмнө авч байж эмчид үзүүлэх эрхтэй болсныг ч хэлэх үү, өвчтөнүүд тэр хугацаанд нэлээд чирэгдэж байгаа гэдгээ хэлж байгаа юм. Тухайлбал эмчид үзүүлэх цаг авсан өдрөө хүлээх хугацаандаа бие нь өвдөхөөс эхлээд олон асуудалтай тулгардаг гэсэн. Шүд нь өвдөөд байж суух газраа олж ядсан хүмүүс аргагүйн эрхэнд эмнэлэгт ирэхэд цаг байхгүй гэдэг шалтгаанаар буцааж байгаа харагдана. Арга ядсан өвчтөн хувийн эмнэлэг рүү хамаг мөнгөө бариад гүйж байгаа юм. Жирэмсэн ээжүүд харъяа хорооныхоо эмчээс бичиг аваад нэгдсэн эмнэлэгт үзүүлэхээр ирэхэд бас л “Үзэхгүй. Заавал цаг авч байж үзүүл” гэнэ. "Цаг авъя" гэхэд ойрын хэдэн өдөр цаг байхгүй гэнэ. Энэ мэт өвчнөө оношлуулах гэж ирсэн иргэдийг “Ийшээ яв. Тийшээ яв” гэж хэлээд цаг хугацаа алдахад хүргэж байгаа нь цахим үйлчилгээний үнэн дүр төрх.

“Эрүүл мэндийн цахим карт” гэж бас нэг зүйл байна. Гол зориулалт нь өвчтөн заавал эмнэлэгт ирж дугаарлаж зогсохгүйгээр утсаар захиалга өгч цаг авах боломжтой юм.  Жирэмсэн ээж, хэвтрийн хүн, өдрийн цагаар ажилтай хүмүүс цахим картан дээрх утасны дугаар луу залгаж үзлэгийн цаг авах боломжтой гэсэн үг юм. Гэтэл утас руу нь залгахад “Заавал өөрөө биеэрээ ирэх ёстой” гэнэ. Уг нь утасдаад захиалгаа өгч болно гэж хэлэн тус картийг хүн бүрт 3500 төгрөгөөр шахсан байдаг. Гэтэл одоо тус карт нь огт ашиглагдахгүй байгаа нь сонин. Ажилтай хүмүүс чөлөө аван байж эмнэлэгт ирж, дугаарлаж зогсож байх жишээтэй л байна. Цаг байхгүй гэдэг шалтгаанаар дахин дахин ирж, очин хайран цагаа барж байгаа нь цахим үйлчилгээ эмнэлэгийн салбарт хэрхэн хэрхэн хэрэгжиж байгааг харуулж байгаа юм. Дашрамд дурдахад цахим картан дээр бичигдсэн дугаар луу нь залгахад өдөржин дуудуулж нэг удаа авч хариулж байх юм.

Тусгай утсаа ажиллуулж, чадахгүй юм бол юунд хүмүүсийн мөнгийг нь авч карт өгснийг тайлбарлах хэрэгтэй гэж иргэд бухимдангүй ярьж байна.

Нэг хүнийг өдөрт 15 минут үзнэ гэж тооцоолоод ажлын найман цагт хуваахаар өдөрт нэг эмч хэвийн тохиолдолд 32 өвчтөн үздэг. Гэхдээ эмч нар нэмэлт цагаар 40, 50 хүн үзэх тохиолдол ч байдаг гэж эмнэлэгийн ажилтнууд хэлж байна. Харин эмч нар үдээс хойш харьцангүй ачаалал багатай байдаг гэж иргэд ярьж байгаа юм. Гурван өдрийн өмнө цаг авч сая нэг үзүүлэх гэхэд эмч нар  хүнгүй байгаа мөртлөө цагаараа ор гээд үзэхгүй байх юм гэж гомдоллох өвчтөнүүд ч байна. Энэ мэт олон асуудал тус салбарт байгаа ч зөвхөн цахим үйлчилгээг авч үзэхэд ийм л дүр төрхтэй байх.