Дэлхийн эдийн засгийн чуулга уулзалт энэ сарын 14-15-ны өдрүүдэд манай улсад зохион байгуулагдах гэж байна. Уулзалтад Засгийн газар, дотоод, гадаадын бизнесийн салбарын манлайлагчид оролцож, Монголын эдийн засгийн ирээдүйн хөгжилд хүрэх тогтвортой арга замыг эрэлхийлэх юм байна. Мөн Монгол Улсын Ерөнхийлөгч Ц.Элбэгдорж, Ерөнхий сайд Н.Алтанхуяг, УИХ-ын дарга З.Энхболд болон УИХ, Засгийн газрын зарим гишүүн энэхүү уулзалтад оролцох аж. Дэлхийн эдийн засгийн чуулга уулзалтын Удирдах зөвлөлийн удирдах гишүүн Бөрге Бренде манай улсын эдийн засгийн талаар ярихдаа "Эдийн засгийн хөгжлийн хурдаараа дэлхийд тэргүүлж буй орнуудын нэг болох Монгол улс нь улам бүр өргөжин тэлж буй уул уурхайн салбараасаа ашиг олж байгаа хэдий ч нөөц боломжоо бүрэн ашиглаагүй хэвээр байна. Тус улс энэхүү салбараас олж буй баялгаа дэд бүтэц, бусад салбарыг хөгжүүлэхэд зориулахыг эрмэлзэж байна. Монгол Улс дахь ядуурлын хувь хэмжээ 2010 онд 39.2 хувь байснаа 2012 онд 27.4 хувь болж буурсан нь эерэг үр дүн юм. Улс орны ирээдүйн хөгжлийг Засгийн газар, бизнес, иргэний нийгмийн манлайлагчид тодорхойлдог хэдий ч зарим нэг тодорхойгүй шалтгаанууд болон гадаад хүчин зүйлс тус улсын хөгжилд нөлөөлсөөр байна. Уг дугуй ширээний уулзалт нь эдгээр хүчин зүйлсийг давуу тал болгож өөрчлөх, зохистой бодлого боловсруулахад бүхэлдээ чиглэх юм. “Ирээдүйн хөгжил цэцэглэлтэд хүрэх бүхий л боломж Монголд байна. Харин энэхүү боломжийг хэрхэн иргэн бүртээ үр ашигтай хүргэх вэ гэдэг асуудал тулгамдаж байна. Учир нь аливаа улс орны хөгжлийн амжилт эцсийн дүндээ ард иргэдийн сайн сайхан байдлаар хэмжигддэг билээ. Хөгжлийн бодлогын тохиромжтой хувилбар, урагшлан дэвжих хамгийн шилдэг арга замын талаар хэлэлцэх арга хэмжээнд оролцож буйгаараа бид бахархаж байна. Миний хувьд, холыг харсан бодлого баримтлахыг чухалчилдаг орны төр, засгийнхантай хамтран ажиллахдаа маш баяртай байна” гэжээ.
Монгол Улсын ирээдүйн хөгжлийн чиг хандлагыг тодорхойлох цогц хувилбаруудыг боловсруулах үүднээс Дэлхийн эдийн засгийн чуулга уулзалт энэ оны туршид 150 орчим дотоодын болон олон улсын оролцогч, шинжээч нартай уулзаж ярилцсан болно. Дугуй ширээний уулзалтаар эдгээр хувилбаруудыг Монгол Улсын хөгжил дэвшлийг хангах чухал ач холбогдолтой дараах гурван стратегийн шийдвэрийг авч хэлэлцэхэд ашиглах юм.
Үүнд:
1. Уул уурхайн салбарын хөгжил, энэ салбараас орж буй орлогоос улс оронд өгөх үр өгөөжийг хэрхэн дээшлүүлэх
2. Эдийн засгийг төрөлжүүлэх арга хэлбэрүүд, түүнийг хэрэгжүүлэх
3. Эдгээрт хүрэхийн тулд баримтлах зарчмууд (худалдаа, хөрөнгө оруулалтын хувьд)
Энэхүү стратегийн шийдвэрүүдийг хэлэлцсэнээр Монгол Улсын хэтийн бодлогын асуудлуудад тус тусын хувь нэмрийг оруулах боломж оролцогчдод нээгдэж байгаа юм. Дотоодын болон олон улсын оролцогчдын хоорондын хэлэлцүүлэг болон Дэлхийн эдийн засгийн чуулга уулзалтын “Монгол Улсын хөгжлийн стратегийн хувилбар” төсөл тус дугуй ширээний уулзалтын үр дүнд тусгагдах юм.
Энэхүү яриа хэлцээ 2014 оны 1 дүгээр сард Швейцарийн Давос-Клостерст болох Дэлхийн эдийн засгийн ээлжит чуулга уулзалтын үеэр үргэлжлэх болно.
