Жил бүрийн 9 дүгээр сарын 16-ны энэ өдрийг озоны давхаргыг хамгаалах олон улсын өдөр болгон тэмдэглэдэг. Энэ өдрийг “Ирээдүйдээ бидний хүсч буй агаар мандал” сэдвийн дор тэмдэглэн өнгөрүүлж байгаа бөгөөд озоны давхаргыг хамгаалах асуудлаар БОНХЯ-ны Озоны үндэсний алба өнөөдөр мэдээлэл хийлээ. Дэлхийн хэмжээнд өнгөрсөн 20 жилийн дотор озоны давхаргыг гэмтээдэг бодисыг гидрохлорфторт нүүрстөрөгч хэмээх бодисоор сольсон боловч энэ нь дэлхийн дулааралд ихээхэн нөлөөтэй хүлэмжийн хийг ихээр агуулдаг аж. Тиймээс энэ бодисыг дараагийн хорин жилд өөр бодисоор солих зорилго тавин улс орон бүр ажиллаж байна.
Манай улс 1996 онд нэгдэн орсон бөгөөд гидрхлорфторт нүүрстөрөгчийн төрлийн бодисыг хөргөгч хөлдөөгч, кондишн зэрэгт хэрэглэхийг багасгах зорилгоор менежментийн төлөвлөгөө боловсруулан ажиллаж байгаа юм.
Сонирхуулж хэлэхэд озон нь агаар мандал дахь хүчилтөрөгчийн 3 атомын нэгдэл бүхий хамгийн жижиг хэсэг боловч хүмүүсийн эрүүл мэндийг нарны хортой хэт ягаан туяанаас хамгаалагч бамбай болдог. Озоны давхарга цоорсноор нарны хортой хэт ягаан туяа дэлхийн гадрагад шууд тусч, хүний дархлалын системийг доройтуулах, нүдэнд цагаа унах, болор цайх, нүд сохрох, арьсны хорт хавдар үүсгэх, арьсыг эрт хөгшрөөх, экосистем алдагдах, ургамлын гарц буурах, давжаарах зэрэг сөрөг үр дагавар бий болно.
Тэгвэл озоны давхаргыг хамгаалахад иргэдийн оролцоо чухал бөгөөд озон задалдаг бодис агуулсан хөргөгч, хөлдөөгч, хөргүүр, эйр кондишн, хөргөх лангуу зэрэг хөргөх тоног төхөөрөмж худалдан авахгүй байх хэрэгтэй юм.
