Арслантай гүүрний баруун талд байрлах “Номын цагаан өргөө” номын худалдааны төвийг буулган автомашины зогсоол байгуулах гэж байгааг эсэргүүцсэн түрээслэгчид өнөөдөр хэвлэлийн бага хурал хийлээ. Тэд энд 1990-ээд оноос эхлэн номын худалдаа хийж байгаа бөгөөд эндээс 40 гаруй хүн амжиргаагаа залгуулдаг байна.

Буулгах тухай шаардах хуудсыг тэдэнд 10-аад хоногийн өмнө ирүүлсэн ч тэднийг цаашид хаана үйл ажиллагаагаа явуулахыг зааж өгөөгүй байна. Энэ асуудлаар “Есүй” баарны эзэн өмнө талбайдаа байдаг асрын оронд тус номын худалдааны төвийг  байгуулж түрээслэх саналыг тэдэнд тавьжээ. Гэсэн ч  түрээслэгчид үүнийг амьдралын баталгаа болж чадахгүй, найдваргүй зүйл хэмээн үзэж байгаа бөгөөд хэрэв хотын удирдлагууд газар зааж өгвөл тэд өөрсдөө номын худалдаагаа байгуулан ажиллах хүсэлтэй байгаа аж. Одоогоор номын худалдааны эргэн тойронд шороо асган худалдаа хийх боломжгүй болгосон байгаа юм. Ид орлогоо олдог сард нь гэнэт ийм арга хэмжээ авахаар болсонд түрээслэгчид бухимдан "Номыг гудамжинд гарган тэдний хөөж байдаг улс манайхаас өөр хаа ч байхгүй" хэмээж байлаа.