Нийслэлийн Мэргэжлийн хяналтын газраас нийслэлийн есөн дүүргийн нутаг дэвсгэрт худалдаа, хоол үйлдвэрлэл,  үйлчилгээний чиглэлээр үйл ажиллагаа явуулж буй 1359 газарт хяналт шалгалт хийжээ.

Шалгалтаар хоолны газрын стандартын шаардлагыг мөрдөж ажилладаггүй “Амттаны дээж” ХХК-ийн кафены үйл ажиллагааг түр хугацаагаар зогсоосон байна. Мөн тусгай зөвшөөрөлгүй үйл ажиллагаа явуулж байсан “Рокси” диско баар, “Хангай” баарны үйл ажиллагааг цагдаагийн байгууллагатай хамтран зогсоох арга хэмжээ авчээ.

Шалгалтын явцад “Наран арт” ХХК-ийн хүнсний дэлгүүр нь “ЗУ” ХХК-д үйлдвэрлэсэн архи шошгын зөрчилтэй, хүчингүй акцтай архи зарж байсан нь тогтоогдсон байна. Тус 22 шил архийг хураан авч, дээжийг лабораторит шинжлүүлэхэд стандартын шаардлагыг хангахгүй, хатуулаг султай нь тогтоогдсон байна. Мөн “Гуулинсайхан” ХХК-ийн “Рич” кафе нь хоол үйлдвэрлэл, ажлын байрны стандартын шаардлага хангахгүй, ажилчид нь эрүүл мэндийн урьдчилан сэргийлэх үзлэгт хамрагдаагүй, спиртийн сул агууламжтай согтууруулах ундаагаар үйлчлэх зөвшөөрөлтэй байж спиртийн өндөр агууламжтай согтууруулах ундаа худалдан борлуулж түүгээр үйлчилж байсан нь илэрчээ.

Мөн “Аягын нуур” ХХК-ийн “Kisso” баар, “Молор трейсур” ХХК-ийн “Hanther” бааранд зурагт хуудсаар согтууруулах ундааг сурталчилж байжээ. Мөн “Би Эн Ай Эс” ХХК нь архи согтууруулах ундаагаар үйлчлэх тусгай зөвшөөрөл гараагүй байхад шар айргаар үйлчилж байсан байна. “Эрхэс” хүнсний дэлгүүр нь тусгай зөвшөөрлийн хугацаа дууссан байж согтууруулах ундаа худалдан борлуулсан зэрэг нийт шалгалтын явцад 690 зөрчил илрүүлэн 431 зөрчлийг газар дээр нь арилгуулах арга хэмжээ авч, илэрсэн зөрчилд улсын байцаагчийн хугацаатай албан шаардлагуудыг өгч, 28 аж ахуйн нэгж, байгууллага, 8 албан тушаалтанд 8.300.2 мянган төгрөгийн торгууль ногдуулсан байна. Мөн 34 нэр төрлийн 120 ширхэг, 1017.6 мянган төгрөгийн согтууруулах ундааг улсын байцаагчийн актаар хураан авч улсын орлого болгох, үнэлэж, устгажээ.