Өнөөдөр болсон НИТХ-ын Тэргүүлэгчдийн ээлжит хуралдаанаар Нисэхийн “Цагаан хаалга”-ыг шилжүүлэн байршуулах тухай асуудлыг хэлэлцэн баталлаа. Тус хаалга нь улсын төсвийн хөрөнгө оруулалтаар хийгдэж байгаа Яармагийн гүүрнээс Нисэхийн товчоо хүртэл 13,7 км замын трасст орсон аж. Зам засварын ажлын зураг төсөлд тус хаалганы өргөн таарахгүй байгаа бөгөөд хаалга байрласан хэсгийн газрыг  3,5 м ухах шаардлага гарсан байна.

Иймээс тус хаалгыг нураах, Айдсын даваа орчимд дахин барьж байгуулах тогтоолын төслийг хуралд оруулж ирсэн нь энэ юм.  Хурлаас Нисэхийн “Цагаан хаалга”-ыг нураах шийдвэрийг баталсан бөгөөд дахин нийслэлийн төсвөөс хөрөнгө мөнгө гарган барих шаардлагагүй гэж үзлээ.

Мөн энэ хаалгыг хэзээ буулгах талаар тогтоолын төслийг танилцуулсан НАЗГ-ын дарга Д.Нанзаддоржоос лавлахад "Зам засварын ажлыг хийж буй компанитайгаа ярилцаж байгаад өнөө маргаашгүй буулгана" гэсэн хариултыг өгч байлаа.

Нисэхийн “Цагаан хаалга” нь 1957 онд Орос Монголын найрамдалт харилцааны бэлэгдэл болон баригдсан бөгөөд түүнээс хойш өнгөн талын засвар хэд хэдэн удаа хийгдэж байжээ.