Өнгөрсөн долоо хоногт МҮЭ-ийн холбооныхон улсын хэмжээний томоохон эмнэлэгүүдэд ажиллаж, тэнд ажиллагсадын цалин хөлс, тэтгэвэр тэтгэмж, ажиллах орчин нөхцлийн талаар ярилцсан байна.

 Ингэхдээ Улсын нэгдүгээр төв эмнэлэг, Улаанбаатар сувилал, Сонгинохайрхан дүүргийн нэгдсэн эмнэлэг, Эх хүүхдийн эрүүл мэндийн үндэсний төв зэрэг эмнэлэгүүдэд ажиллажээ.  Эмнэлэгүүдэд ажиллаж байх явцдаа эмч, эмнэлэгийн ажилчдын өөрсдийнх нь санал гомлыг сонсож, цаашид авах арга хэмжээний талаар нухацтай сайн ярилцсан гэдгийг МҮЭХ-ны Ерөнхийлөгч Х.Амгаланбаатар хэлэв.

Хамгийн эхэнд эмнэлэгийн ажилчдын цалин хөлсийг нэмэгдүүлэх шаардлагатай байна гэдгийг МҮЭХ-ны Ерөнхийлөгч Х.Амгаланбаатар онцоллоо.

Тодруулбал сургуулиа төгсөөд ажилд орж буй эмч 430 мянган төгрөгийн цалин авдаг бол 30 гаруй жил ажилласан тэргүүлэх зэргийн эмч 529 мянган төгрөгийн цалин авдаг байна. Нөгөө үндэсний статистикийн хорооноос зарласан 900 мянган төгрөгийн дундаж цалин эмнэлэгийн салбарт огт хэрэгжихгүй байна гэв. 


Цаашлаад эмнэлэгүүдэд ажиллах явцад хэд хэдэн ноцтой зөрчил илэрсэн байна

Үүнд:

1.    Бөөрний дутагдлыг эмчилдэг Гемодиализийн аппарат улсын хэмжээнд 59 ширхэг л байдаг аж. Үүнийг нэн даруй 108 болгож нэмэгдүүлэхгүй бол бөөрний дутагдалтай олон хүн өвчнөө эмчлүүлж чадахгүй хорвоог орхиж байгаа гэдгийг эмч нар хэлж байна.

2.    Эрүүл мэндийн даатгалын сангаас сувилалын нэг оронд 95 мянган төгрөг өгч байгааг нэмэгдүүлж, 108 болгох шаардлагатай байгаа аж. Ор ашиглалтад 95 мянган төгрөг өгч байгаа нь чанартай үйлчилгээ авахад саад болж байгаа юм байна.

3.    Ашиглалтадын хугацаа нь дууссан атал одоог хүртэл ажиллаж байгаа хэд хэдэн эмнэлэг байгаа аж. Мөн өргөтөл барих шаардлагатай эмнэлэгүүд ч байна. Тухайлбал Улаанбаатар сувилалийн байр л гэхэд 1936 онд баригдсан бөгөөд аль хэдийн ашиглалтын хугацаа нь дуусчээ. Мөн тус байр нь байнга цууралт өгч байгаа ба ойр орчимд нь хүнд даацын машин явахад л чичирхийлэлт өгдөг байна. 

4.    Мөн эмч, сувилагч, асрагч нарт нэмэгдэл цалин хөлс маш бага өгдөг  байна. Тодруулбал хортой хүнд нөхцлийн нэмэгдлийг үндсэн цалингийн 10 хувиар олгох ёстой ч 10 000 төгрөг өгдөг аж. Эх хүүхдийн эрүүл мэндийн үндэсний төвийн эмч нар орон нутагт дуудлагаар ажиллахад 28 800 төгрөг өгөх ёстой ч 14 000 төгрөг олгодог байна. Цаашлаад шөнө жижүүр хийсэн эмч нарын 4 цагийг унтах ёстой цаг гээд илүү цагт тооцдоггүй байна.

5.    Улаанбаатар, Оргил рашаан сувиллаар үйлчлүүлэгчдийн орны хүлээгдэл урт хугацаатай байгаа.

6.    Хүмүүс эмч мэргэжлийг эзэмшихын тулд 10 жил суралцсаны эцэст 465-627 мянган төгрөгийн цалин авч байгаа нь хөдөлмөрийн үнэлэмж эрүүл мэндийн салбарт туйлын доогуур байгааг илтгэж байна хэмээн эмнэлэгийн ажилтнууд хэлж байна. Сувилагч, асрагч болон бага тушаалын ажилчдын цалин бүр бага байна. Иймээс цалин хөлсийг 3-5 дахин нэмэгдүүлэх шаардлагатай байгааг онцоллоо.

7.    Сүүлийн үед эмнэлэгийн ажилчдын нэр хүнд их унаж байгаа. Тиймээс эмнэлэгийн мэргэжилтнүдийн нэр хүндийг сэргээж хамгаалах ажлыг ЭМЯ анхааралдаа авахыг шаарджээ.

Дээрх нийтлэг зөрчил, дутагдлыг арилгах талаар МҮЭХ, Монголын эрүүл мэндийн ажилтны ҮЭ-ийн холбооноос дараа найман чиглэлээр ЭМ-ийн сайдад албан мэдэгдэл хүргүүлжээ.

1.    Гемодиализийн аппарат улсын хэмжээнд 59 байгааг 108 болгон нэмэгдүүлэх.

2.    Эмнэлгүудийн барилгын ашиглалт нөхцөл байдалд нэгдсэн үзлэг хийж, тодорхой арга хэмжээ авах.

3.    Эрүүл мэндийн даатгалын тухай хуулийн хүрээнд олгогдож байгаа нэг оронд ногдох санхүүжилтыг нэмэгдүүлэх талаар апга хэмжээ авах.

4.    “Эрүүл мэндийн ажилтанд нэмэгдэл, нэмэгдэл холс олгох тухай” Засгийн газрын 150, 151-р тогтоолын хэрэгжилтийг байгууллаг бүрт жигд хангуулах.

5.    Уламжлалт анагаах ухаан шинжлэх ухаан технологи үйлдвэрлэлийн клиник корпорацийн эмнэлэг болон Оргил рашаан сувилалын орны тоог нэмэгдүүлж, хүлээгдлийг багасгах.

6.    Шөнийн цагийн болон орон нутагт томилолтоор ажилласан нэмэгдлийг зохих ёсоор олгуулах, журамлах.
7.    Эмнэлгийн мэргэжилтний нэр хүндийг сэргээж хамгаалах ажлыг анхааралдаа авах.

8.    Эрүүл мэндийн салбарын ажиллагсадын хөдөлмөрийн үнэлэмж, цалин хөлсийг нэмэгдүүлэх асуудлыг нэн даруй шийдвэрлэх.