Манай улс дэлхийн аялал жуулчлалын өдрийг угтан энэ чиглэлээр мэргэжилтэн бэлтгэдэг их дээд сургуулийн оюутан залуусын дунд “Гранд тур” олимпиадын зохион байгуулж байгаа. Энэ талаар  Нийслэлийн Аялал жуулчлалын газар, Аялал жуулчлалын багш судлаачдын нийгэмлэгээс 14.00 цагт Хангарьд ордны 14 давхрын “А” зааланд мэдээлэл хийх гэж байна.

“Гранд тур” олимпиад нь аялал жуулчлалын чиглэлээр суралцаж буй оюутан залуусын мэргэжлийн ур чадварыг дээшлүүлэх, судалгаа шинжилгээний ажлыг дэмжих, аялал жуулчлалыг нийтэд сурталчилах зорилготой 11 дэх жилдээ зохион байгуулагдаж байгаа юм. Энэ жил МУБИС-д аялал жуулчлалын мэргэжилтэн бэлтгэсний 20 жилийн ойн хүрээнд “Дотоодын аялал жуулчлалын хөгжлийн асуудал” сэдвийн дор болж буйгаараа онцлог аж.

Олимпиадын хүрээнд аялал жуулчлалыг сурталчлах үзэсгэлэн, “Дотоодын аялал жуулчлалын хөгжлийн асуудал” сэдэвт оюутны эрдэм шинжилгээний бага хурал, танин мэдэхүйн “Центавр” асуулт хариултын тэмээн, “Grand tour”спорт явган аяллын тэмцээн зэрэг үйл ажиллагаануудыг явуулж, ангилал тус бүрээр 1-ээс 3-р байр шалгаруулан, багийн дүнгээр шилжин явах цомын эзнийг тодруулдаг. 

Мөн байгалиа хамгаалах, Туул голоо сэргээхэд хувь нэмрээ оруулах үүднээс уг олимпиадад оролцсон оюутан залуус болон салбарынхан Туул голын сав дагуух зарим газар, Хар усан тохой орчмын хог хаягдлыг цэвэрлэх аянд өнгөрсөн амралтын өдрүүдэд оролцсон юм. Тус арга хэмжээнд нийт 14 их дээд сургуулийн 100 гаруй оролцож адал явдалт явган аяллын цогц тэмцээний хүрээнд усан завины уралдаан, байрлал тогтоох зүг чиг олох, ууланд авирах, анхны тусламж үзүүлэх зэрэг ур чадвар тэсвэр хатуужил шаардсан уралдаан тэмцээнд хамрагдсанаас гадна сүүлийн өдөр Хар усан тохой орчмын хог хаягдлыг цэвэрлэх аянд идэвхтэй оролцжээ. "Центавр" танин мэдэхүйн тэмцээн, оюутны эрдэм шинжилгээний бага хурал зэрэг бусад арга хэмжээнүүд нь өчигдрөөс эхэлсэн. Ирэх баасан гарагт буюу Дэлхийн аялал жуулчлалын өдөр Үндэсний төв музейн гадна талбайд Аялал жуулчлалын мэргэжил сурталчлах үзэсгэлэн зохион байгуулснаар энэ олимпиад хаалтаа хийх юм.

Сонирхуулж хэлэхэд 1979 онд Дэлхийн аялал жуулчлалын байгууллагын Ерөнхий Ассамблейн 3-р чуулганаас дэлхийн аялал жуулчлалын өдрийг жил бүрийн 27-нд тэмдэглэн өнгөрүүлж байх шийдвэрийг гаргасан. Энэ жил тус өдрийг “Ус ба аялал жуулчлал /Ирээдүйгээ хамгаалцгаая/” уриан дор дэлхий нийтээр тэмдэглэн өнгөрүүлэх аж.